Дьокуускай куоракка эдэр чинчийээччилэр ортолоругар буола турар В.П. Ларионов аатынан “Инникигэ хардыы” өрөспүүбүлүкэтээҕи XXIX научнай-практичческай ааҕыылар күрэстэригэр былырыын 50 оҕо кыттыбыт буоллаҕына, быйыл 56 оҕо кытта сылдьар, онтон Мүрүтээҕи уолаттар гимназияларын, Дүпсүн орто оскуолатын, Лөгөйдөөҕү лицей-интернат, Мүрү 1-гы №-дээх, 2-с №-дээх, Суотту, Тумул, Чэриктэй, Танда, Мындааба орто оскуолаларын үөрэнээччилэрэ – барыта 38 оҕо иккис тууру ааста. Улууспут оҕолоро тугу чинчийэллэр эбит диэн интэриэһинэй тиэмэлэри көрүөххэ.
Ол курдук, Мүрүтээҕи уолаттар гиназияларын үөрэнээччиттэн Айал Атласов (5-с кылаас) ахсаан головоломкатын суоттаан, улууспут историятын үөрэтэр эбит, Дамир Васильев (10-с кылаас) собо балык хатырыгыттан полиэтилен матырыйаалы оҥорору үөрэппит, оттон Ефим Павлов (7-с кылаас) үүт хаачыстыбатын анаалыстаабыт. Тулуна орто оскуолатын 9-с кылааһын үөрэнээччитэ Амелия Бурнашева аһылык, пакеттаах чэй хаҕын, суутун кутталын туһунан чинчийбит. Оттон Суотту орто оскуолатын 8-с кылааһын үөрэнээччитэ Михаил Котоконов клубниканы сылы эргиччи үүннэрэр анал иһити (гроубокс) оҥорбут. Түүлээх орто оскуолатын үөрэнээччитэ Артем Винокуров нэһилиэгэр экологическай-кыраайы үөрэтэр туризмы сайыннарар туһунан бырайыак төһө инникилээҕин көмүскүүр. Мүрү 1-гы №-дээх орто оскуолатын 7-с кылааһын үөрэнээччитэ Томтор сэдэх мельницаларын чинчийэр, Мүрү 2-с №-дээх орто оскуолатын 7-с кылааһын үөрэнээччитэ Мас Мэхээлэ сыдьааннарын үөрэтэр. Тумул орто оскуолатын 5-с кылааһын үөрэнээччитэ Дархан Илларионов пластиковай хаппахтартан «Алгыстаах алаадьы» диэн брелоктары оҥорорун туһунан кэпсиир. Чэриктэй орто оскуолатын 11-с кылааһын үөрэнээччитэ Сарыала Алексеева сахалыы хоһооннору английскай тылга тылбаастаан тылы үөрэтэр ньыманы тобулбут. Чараҥ орто оскуолатын 11-с кылааһын үөрэнээччитэ Олеся Крылова «Ситим» компьютернай оонньуу саҥарар саҥаны сайыннарарын дакаастыыр. Маны таһынан, компютернай бырагыраамалартан саҕалаан төрүт үгэспитигэр тиийэ араас хайысхаларга оҕолор чинчийэр үлэлэрин көмүскүүллэр.
Мария АРГУНОВА