Бүгүн, балаҕан ыйын 21 күнүгэр, улуус Сэбиэтин бастакы тэрээһин сессията ыытылынна. Улуустааҕы быыбардыыр хамыыһыйатын бэрэссэдээтэлэ Иннокентий Сергеев быыбар түмүктэрин билиһиннэрдэ. Улуус баһылыгынан талыллыбыт Василий Аммосовка – баһылык, улуус мунньаҕын дьокутааттарынан буолбуттарга дьокутаат дастабырыанньаларын туттарда.
Салгыы бастакы тэрээһин сессияны саамай аҕа саастаах дьокутаат Юрий Троев ыытар чиэһи ылла. Сессия сэкирэтээринэн Гаврил Тимофеев буолла. Бастакы тэрээһин сессия мандатнай хамыыһыйатыгар Гаврил Шелковников, Гаврил Бурцев, Наум Ермолаев киирдилэр. Хамыыһыйа бэрэссэдээтэлинэн төрдүс төгүлүн дьокутаат мандаатын туппут Гаврил Бурцев буолла. Кини дьокутааттар туох үлэлээхтэрин, үөрэхтээхтэрин, ханнык баартыйаттан турбуттарын туһунан дакылаат оҥордо.
Улуус баһылыга Василий Аммосов улуус дьокутааттарын Сэбиэтин бэрэссэдээтэлинэн Андрей Стрекаловскай кандидатуратын туруорда. Оттон дьокутаат Михаил Борисов «Биир ньыгыл Россия» баартыйа аатыттан Иннокентий Аммосов кандидатуратын туруорда.
Бэрэссэдээтэли талыыны дьокутааттар кистэлэҥ куоластааһынынан ыытарга быһаардылар. Манна 19 дьокутаат бары кытыннылар.
Куоластааһын түмүгүнэн үгүс куолаһы ылан улуус дьокутааттарын Сэбиэтин бэрэссэдээтэлинэн Иннокентий Аммосов буолла. Салгыы сессияны Иннокентий Аммосов ыытта. Кини бэрэссэдээтэли солбуйааччы дуоһунаһыгар кандидаттары туруорарга этии киллэрэн Влади́мир Дьяконов уонна Гаврил Тимофеев кандидатуралара туруорулуннулар. Аһаҕас куоластааһын түмүгүнэн Гаврил Тимофеев улуус дьокутааттарын Сэбиэтин бэрэссэдээтэлин солбуйааччынан талылынна.