Быраас аан дойдутааҕы күнүн көрсө киин балыыһа коллективыгар быйыл үөрэхтэрин саҥа бүтэрэн үлэлии кэлбит анал идэлээх специалистары үөрүүлээх быһыыга-майгыга көрсүү сиэрэ-туома ыытылынна.
Бастакынан эҕэрдэ тылы улуус кылаабынай бырааһа Анна Петрова этэн туран, улуус эмчиттэрин кэккэлэрин хаҥаппыт эдэрдэргэ таһаарыылаах үлэни, үтүө майгылаах, аһыныгас дууһалаах, сымнаҕас илиилээх, ыарыһахтар махталларын ылар үлэһиттэр буолалларыгар баҕа санаатын тиэртэ. Итиэннэ Суотту врачевнай амбулаториятын терапевт бырааһын Татьяна Пономареваны, лор быраас Марфа Устинованы, Бээрийэ фельдшерын Алина Колодезникованы, “Суһал көмө” фельдшердэрин Вячеслав Софронов-Лины, Арчын Егоровы, “Суһал көмө” медсиэстэрэтин Саина Пухованы, экономист Михаил Орловы билиһиннэрдэ.
2017 сылтан эдэр үлэһиттэргэ анабыл күнтэн саҕалаан, сыллата улуус саҥа эмчиттэринэн кэккэтэ хаҥыыр. Өссө сотору кэминэн Тулунаҕа быраас уонна киин балыыһаҕа рентгенолог быраас үлэлии кэлэллэрин кэтэһэллэрин туһунан биллэрдэ. Эдэр специалистар улахан коллектив бары тэрээһиннэригэр, араас күрэстэргэ, нэһилиэктэринэн сырыыларга көхтөөхтүк кытталларыгар ыҥырда. Улуус кылаабынай бырааһа Анна Саввична эдэр специалистарга туһаайан: “Бэйэҕит талааҥҥытынан, дириҥ билиигитинэн, дьоҥҥо ытыктабыллаах сыһыаҥҥытынан, бэйэҕитин бары өттүнэн үтүөтүк көрдөрөн үлэлээҥ-хамсааҥ”, – диэн алгыстаах тылларынан көрүстэ.
Үөрүүлээх күҥҥэ улуус баһылыга Василий Аммосов кыттыыны ылан туран, киһи доруобуйатын араҥаччылыырга анаммыт эмчиттэргэ олорор усулуобуйаларын тупсарарга быйылгы сылга Бороҕоҥҥо уонна Дүпсүҥҥэ биирдии үлэһит дьиэнэн хааччылларын туһунан үөрүүлээх сонуннаах истиҥ эҕэрдэтин тиэртэ. “Үтүө дьыала” хамсааһын чэрчитинэн эһиилгиттэн Бороҕоҥҥо аҕыс квартиралаах, Өспөххө, Өнөргө, Тулунаҕа түөртүү квартиралаах дьиэлэр эдэр специалистарга ананан тутуллар былааннааҕын, аныгы дьиэлэр толору хааччыллыылаах буолуохтаахтарын туһунан иһитиннэрдэ. Итиэннэ улуус киин балыыһатын хирургическай салаатын анестезиолог-реаниматолог бырааһын Сергей Попову үрдүк көрдөрүүлээх үлэтин иһин бочуотунай грамотанан наҕараадалаата. Бу курдук идэлээх эмчиттэр сыллата улуус нэһилиэнньэтин доруобуйатын араҥаччылаан кэккэлэрэ хаҥыы, олохтоохтор махталларын ыла туралларыгар баҕа санаатын тиэртэ.
Мүрү нэһилиэгин баһылыга Прокопий Румянцев эдэр исписэлиистэргэ дьаһалта өттүттэн болҕомто өрүү баарын туһунан үөрүүлээх быһыыга-майгыга биллэрдэ. Эдэр үлэһиттэри олохтуурга дьиэ-уот тутуута, сынньанар сирдэри, уулуссалары оҥоруу, сырдатыы үлэтэ сыллата ыытылларын туһунан сырдатта. Саҥа кэлбит эмчиттэр Мүрү эбэтин сөбүлээн олохсуйа хаалалларыгар, нэһилиэнньэ махталын, билиниитин ыла туралларыгар баҕарда.
Салгыы улуус эмчиттэрин профсоюһун салалтатыттан Индира Захарова, улуус поликлиникатын сэбиэдиссэйэ Анна Сивцева саҥа кэлбит үлэһиттэргэ – терапевт быраас Екатерина Бурнашеваҕа, медсиэстэрэ Наталья Домотоваҕа, экономист Ян Омукчановка, о.д.а. анал бэлиэлэри туттаран туран, саҥа үлэлэригэр ситиһиилэри баҕарда.
Улуус эмчиттэрэ эһиилги 125 сыллаах үбүлүөйдээх сылларын үтүө түмүктэрдээх, ситиһии көтөллөөх көрсөллөрүгэр саҥа соруктар, инники кирбиилэр турдулар.
Светлана Сивцева