Уус Алдан улууһа 2024 сылы түмүктүүр бэлиэ күнүгэр улуус баһылыгын атын симэҕин биһирэмэ ыытыллыбыта. Ону тэҥэ улуус 11 нэһилиэгиттэн ат симэхтэрин көрдөрүүгэ туруорбуттара. Баһылык атын симэҕин кимнээх хаһааҥҥыттан оҥордулар диэн сиһилии «Олоҥхо дьиэтэ» этнокультурнай киин уус-уран салайааччыта Елизавета Данилова билиһиннэрдэ:
– Уус Алдан улууһун баһылыгар ат симэҕин оҥоруу үлэтэ 2022 сылтан саҕаламмыта уонна 2024 сыл бэс ыйыгар түмүктэммитэ. Улуус дьаһалтата үбүн көрөн, ат симэҕэ олоччу үрүҥ көмүһүнэн киэргэтилиннэ. Ат симэҕин ыҥыырын, иҥэһэтин, кымньыытын СӨ норуотун маастара, көмүс ууһа Прокопий Колодезников, бас быатын, тэһиинин, холун быатын, бототун, кымньыыны СӨ норуотун маастара Татьяна Дегтярева, СӨ уус-уран оҥоһуктарын маастара Марфа Васильева, бэрэмэдэйин Елена Слепцова, чаппарааҕын, кычымнарын, лэпсэтин, бэрэмэдэй сабыыларын СӨ норуотун маастара Екатерина Бочкарева оҥордулар.
Биһирэмҥэ айымньылаах үлэҕэ үлэлээбит уустарбыт ааттарыттан Екатерина Михайловна улуус дьаһалтатыгар үйэлээх оҥоһугу оҥорууга кыах биэрбиттэригэр махталын тиэртэ. Оттон Емельян Ярославскай аатынан хотугу норуоттар историяларын уонна культураларын холбоһуктаах судаарыстыбаннай түмэлин этнографияҕа салаатын сэбиэдиссэйэ, археолог, этнограф Василий Попов өбүгэлэрбит аттарын симэҕин уратыларын ыйан кэпсээтэ.
Бэлиэтиир буоллахха, Уус Алдаҥҥа 2012-2014 сс. ат симэҕин көрүү-күрэс ыытыллыбыта.
Бу күрэс түмүгүнэн нэһилиэктэрбитигэр ат толору симэхтэрэ оҥоһуллубуттара. Бу симэхтэр араас көрүүлэргэ өрөспүүбүлүкэҕэ, Россияҕа, тас дойдуларга тиийэ сылдьан кыайыылары ситиспиттэрэ. Олору эмиэ биһирэм кэмигэр быыстапкаҕа туруораннар, дьон-сэргэ олус сэргээтэ.
Ольга Шепелева хаартыскаҕа түһэриилэрэ