I Өспөх нэһилиэгин Уһун Күөл бөһүөлэгин олохтооҕо Дамир Дугунов А.В. Ляпидевскай аатынан гражданскай авиация Омскайдааҕы летнай-техническэй колледжыгар пилот идэтин баһылаан, бу күннэргэ «Калачинск» авиационнай базатыгар быраактыкатын барытын туйгун сыанаҕа ааһан, лицензиятын ылан кэллэ. Пилот уол ыам ыйыгар «Полярные авиалинии» үлэтин саҕалаары кынатын куурдар.
Дамир Павлович пилот идэтигэр үөрэммитин туһунан маннык кэпсээтэ:
– Хайа баҕар уол оҕо кыра сааспытыттан «мин летчик буолуом» диэн ыллаан кэллэхпит, ол саҕаттан ыра санаа иитиэхтэммитэ буолуо.
Ону тэҥэ Уһун Күөлүм орто оскуолатын учууталлара, чуолаан, кылааһым салайааччыта Аграфена Федорова, сыралаах үлэлэрин түмүгэ буоллаҕа.Оскуоланы бүтэрэр сылбытыгар билигин дириэктэринэн үлэлиир Наталья Турантаева бу идэни таларбар ыйан-кэрдэн, сүбэлээн, үөрэх бары тэрилтэлэрин кытта эрдэттэн ыкса үлэлэһэн, кылааспыт оҕолоро бука бары тутуспутунан араас идэлэргэ туттарсан киирбиппит. Наталья Гаврильевна сүүрэн-көтөн «Полярные авиалинии» хампаанньаны кытта дуогабар баттаспыппыт. Оччолортон үлэлээх буоларым биллэр буолан, үөрэхпэр да дьаныары үөскэттэҕэ. Онон учууталларбар махталым муҥура суох.
Хайа баҕарар үөрэх, бастатан туран, бэрээдэги, кыһамньыны ирдиир, үөрэх ирдэбилин барытын тута толорон иһэр наада. Сүрүн ирдэбилэ – доруобуйаны сыныйан көрөллөр, эт-хаан өттүнэн бэйэҕин кыанар, спортивнай дааннайдаах буолуохтааххын. Түгэнинэн туһанан, физкультураҕа үөрэппит учууталларбар Николай Федоровка, Александр Жирковка уонна мас тардыһыытыгар утумнаахтык дьарыктаан элбэх ситиһиигэ сирдээбит тренербэр Семен Олесовка махталбын тиэрдэбин.
Омскайдааҕы летнай-техническэй колледж усулуобуйата үчүгэй, уопсай олорор дьиэ, күҥҥэ үстэ босхо аһылык, кэтэр таҥаһы, форманы барытын хааччыйаллар. Үөрэх уустук эрээри, кыһамньыгын уурдаххына, туох барыта кыаллар.
Бу үөрэххэ туттарсыан баҕалаах оҕолорго доруобуйаҕытын эрдэттэн көрүнүҥ, спордунан дьарыктаныҥ, эт-хаан өттүнэн эргиччи сайдыылаах буоларга кыһаллыҥ диэн сүбэлиэм этэ. ГТО-ну кыһыл көмүскэ туттардаххына, үөрэххэ киирии куонкуруһугар эбии баал эбиллэр уонна, кылаабынайа, аттестакка үлэлэһиҥ. Хас биирдии биридимиэт суолталаах. Итиннэ мин эмиэ биир историялаахпын, эмиэ Наталья Гаврильевнам далаһа ууран биэрбитэ. Орто престижтаах үөрэххэ баҕалаах оҕо аттестатын баалыгар күүскэ үлэлэһиэхтээх. Мин аттестатым баала 4,8 этэ, ол үрдүнэн куонкуруска хапсыбат куттал үөскээбитэ. Тоҕо диэтэр, төгүрүччү туйгун сыанаҕа үөрэммит, аттестаттарын орто баала «5» көрө сылдьар оҕолор элбэҕэ сөхтөрбүтэ. Ол иһин Наталья Гаврильевна ыксаан «100 талантов Якутии» программаҕа киллэриигэ үлэлэспитэ. Син бары өттүнэн араас куонкурустарга, олимпиадаларга кыттыым, ситиһиим элбэх буолан, табыллыбыта. Ол программаҕа киирэн, үөрэххэ киирэр куонкуруска бүтэһиккэ кыл-мүччү хапсан киирэн хаалбытым. Туһугар бэйэтэ долгутуулаах этэ. Онон өссө төгүл үөрэххэ кыһаллыҥ, араас күрэстэргэ кыттары суолталааҥ диэн этиэм этэ.
Биир дойдулаахпытыгар эппиэтинэстээх үлэтигэр ситиһиини, үрдүк көтүүнү баҕарыахха.
Мария Аргунова