Суоппардар күннэрин көрсө бүгүн Түүлээххэ тэрилтэлэр уонна түмсүүлэр икки ардыларыгар «Көрдөөх эстафета» буолан ааста. Балыыһаттан, олохтоох дьаһалтаттан уонна «Айылгы» түмсүүттэн үстүү киһилээх хамаандалар турдулар.
Бастакы түһүмэххэ жеребьевка быһыытынан хас биирдии кыттааччы суол быраабылаларын ыйытыыларыгар хоруйдаатылар. Иккис түһүмэххэ хас биирдии кыттааччы ытыыга күрэхтэстэ – манна саамай элбэх очкуолаах олохтоох дьаһалта хамаандата кыайда. Үһүс түһүмэҕинэн мас тардыстылар, манна саамай күүстээҕинэн «Айылгы» түмсүү буолла. Онтон массыына соһуута буолла, манна саамай түргэн эмиэ дьаһалта хамаандата быһаарылынна.
Салгыы көлүөһэни эргитии гэ күрэхтэстилэр уонна хамаандаттан биирдии кыттааччы массыынаны мэһэйдэрдээх суолунан ыытыыга күрэхтэстилэр. Бүтэһик түһүмэххэ балыыһа хамаандата бастаата.
Уопсай түмүккэ үһүс бириистээх миэстэни «Айылгы» түмсүү ылла, иккис миэстэҕэ балыыһа хамаандата таҕыста, бастакы миэстэни дьаһалта хамаандата ылла. Бастаабыт хамаанда чилиэннэригэр ИП Петухов «Үрүлүй» маҕаһыыныттан 1500 солк. суумалаах сертификаттары туттардылар.
Туяра Ушницкая, уопсас. кэрэсп.