Түөрт Геройдаах байаҕантайдар Кыайыы 80 сылын бэлиэтиир тэрээһиннэрин торумнаатылар

Байаҕантай нэһилиэгэр Кыайыы 80 сылын бэлиэтиир тэрээһиннэри ыытыыга бүгүн бастакы сүбэ мунньах ыытылынна. Мунньаҕы нэһилиэк баһылыга Савва Егоров салайда. Кини быйыл Улуу Кыайыы 80 сылын бэлиэтиир олус суолталаах тэрээһиннэргэ Байаҕантай нэһилиэгэ ураты миэстэни ыларын, түөрт Геройдаах нэһилиэк дьонун-сэргэтин, тэрилтэлэрин, түмсүүлэрин иннилэригэр сүдү эппиэтинэс турарын тоһоҕолоон бэлиэтээтэ уонна нэһилиэккэ тэрийэр хамыыһыйа састаабын билиһиннэрдэ.

Салгыы Кыайыы 80 сылын тэрээһиннэрин кэлим былаанын улууспутугар тэрийэр үлэҕэ улахан уоппуттаах, бу иннинэ улууска Улуу Кыайыы 70, 75 сылларын быһаччы тэрийэн ыытыспыт, убаастыыр салайааччыбыт Иван Колодезников билиһиннэрдэ. Кини бу үлэҕэ нэһилиэк салалтата, бэтэрээннэр түмсүүлэрэ этии киллэрэннэр, ылсан үлэлээн эрэрин иһитиннэрдэ уонна кэлим былаан сүрүн түһүмэхтэрин билиһиннэрдэ.

Мунньах кыттыылаахтара үлэ былааныгар бэйэлэрин этиилэрин киллэрдилэр, санааларын эттилэр. «Улуу Кыайыы 80 сылыгар – 80 Албан аат күннэрэ!» диэн акцияттан олунньу 19 күнүттэн саҕалаан ыам ыйын 9 күнүгэр диэри нэһилиэккэ 80 күн устата тиһигин быспакка араас өрүттээх тэрээһиннэр ыытыллыахтара. Үлэ сүрүн хайысхата оҕо аймахха, үүнэр көлүөнэҕэ туһуланыа, баар өйдөбүнньүк бэлиэлэри саҥардыы, тупсаран оҥоруу, урукку холкуостар сирдэригэр саҥа бэлиэлэри туруоруу былааҥҥа киирдэ. Биир бэлиэ бырайыагынан «Биһиги дьиэ кэргэн өйдөбүнньүгэ…» диэн нэһилиэктэн сэриигэ кыттыбыт буойуттар Өйдөбүнньүк күннэрин тэрийэн ыытыы буолуоҕа.

Байаҕантай нэһилиэгиттэн 130 киһи Ийэ дойду көмүскэлигэр туруммуттара, кинилэртэн 78 киһи кыргыһыы хонуутугар охтубуттара, 35 буойун сураҕа суох сүппүттэрэ, 52 саллаат Кыайыы өрөгөйдөөх дойдуларыгар эргиллибиттэрэ. Күн бүгүн нэһилиэккэ 1 тыыл бэтэрээнэ, 6 сэрии сылын оҕото олороллор.

Бу үбүлүөйдээх тэрээһиннэр чэрчилэринэн «Кыайыы нэдиэлэтэ», «Кыайыы ыһыаҕа», Советскай Союз Геройа В.Д. Лонгиновка, Россия Геройа А.М. Неустроевка аналлаах патриотическай десант, о.д.а. тэрээһиннэр ыытыллыахтара, үгүс культурнай-маассабай, общественнай-политическай, спортивнай тэрээһиннэр буолуохтара. Сэрии, тыыл бэтэрээннэрин, сэрии сылын оҕолорун, СВО кыттыылаахтарын дьиэ кэргэттэригэр ахсаабат көмө акциялара тиһигин быспакка ыытыллыахтара.

Салгыы тэрийэр комиссия биэс түһүмэхтээх үлэ былаанын олоххо киллэриигэ үлэлэһиэҕэ. Улуу Кыайыы 80 сылыгар аналлаах кэлим үлэ балаҕан ыйын 3 күнүгэр Аан дойду иккис сэриитин уонна милитаристскай Японияны үлтүрүтүү, В.Д. Лонгинов төрөөбүт күнүгэр ыытыллар тэрээһиннэринэн түмүктэниэҕэ.

Степан Федоров, нэһилиэк бэтэрээннэрин түмсүүтүн салайааччы