Күлүмнүүр аатынан «Тойон Мүрү» култуура дыбарыаһыгар оскуолалар 9-11 кылаастарын үөрэнээччилэрэ өрөспүүбүлүкэтээҕи «ТуоС» (Тыл уонна Сатабыл) саха тылынан интеллектуальнай оонньуу улуустааҕы этаабыгар күөн көрүстүлэр.
Оонньууну киин куораттан өрөспүүбүлүкэтээҕи норуот айымньытын дьиэтиттэн үлэһиттэр кэлэн ыыттылар. Күрэхтэһиигэ биэстии оҕолоох 5 хамаанда кытынна: «Сайдыс» Уһун Күөл, «Эрэл» Майаҕас, «Эһэлээх эрэллэрэ» Өнөр оскуолаларыттан уонна Мүрү 1 нүөмэрдээх орто оскуолаларыттан «Күн оҕолоро» – 11 «в» кылаас, «Мүрү эрэллэрэ» – 10 «а» кылаас. Оонньууну уус-уран хомоҕой тыллаах Александр Гоголев ыыппыта көрөөччүлэри, хамаандаҕа ыалдьааччылары сэргэхситтэ.
Биэс түһүмэхтэн турар оонньуу түмүгүнэн 1-кы миэстэни Мүрү 1 нүөмэрдээх орто оскуолатын 10 «а» кылааһын хамаандата (кыл. сал. Л.В. Бурцева, саха тылын учуутала М.Д. Местникова) ылан анал куубагынан, туоһу суругунан, 15 тыһыынча харчынан бириэмийэни тутта. 2-с м. Өнөр орто оскуолатын «Эһэлээх эрэллэрэ» хамаандата тахсан, 10 тыһыынча солк., 3-с м. «Сайдыс» хамаанда – Уһун Күөл оҕолоро – ылан, 5 тыһыынча солк. туттулар. Иккис уонна үһүс миэстэҕэ тахсыбыттар эмиэ куубагынан бэлиэтэннилэр, кыттааччылар туоһу сурук туттулар.
Кыайбыт «Мүрү эрэллэрэ» хамаанда Төрөөбүт тыл, сурук-бичик күнүгэр, олунньу 13 күнүгэр, өрөспүүбүлүкэтээҕи түмүктүүр оонньууга ыҥырылынна.
Елена Сыроватская, уопсас. кэрэсп.