Бу күннэргэ тимир көлөлөөх күүстээх аҥаардар өр күүтүүлээх түгэннэрэ – “УАЗ-Экстрим” өрөспүүбүлүкэтээҕи аһаҕас күрэс Нам улууһун 2-с Хомустаах нэһилиэгэр буолан ааста. Уопсайа 20 карбюратордаах, 21 инжектордаах массыыналар кыттыыны ыллылар. Биһиги улууспутуттан 7 экипаж ох курдук оҥостон, өрөспүүбүлүкэ чулууларын кытта илин-кэлин түһүстүлэр. Ол курдук, Курбуһахтан “Баат”, Тумултан “Модун”, Дүпсэттэн “Дүпсүн”, Мүрүттэн “Эрэл”, Арыы Тииттэн “Баракуда”, “Сириус” уонна “Бизон” хамаандалар ситэн-хотон тиийдилэр. Урут түһэн эттэххэ, биһиги улууспутуттан инжектордаах массыына кыттыбата.
Күрэс түөрт түһүмэҕинэн барда. Бастакы түһүмэххэ хамаандалар былааҕы эргийэн кэлиигэ күрэхтэстилэр. Тыҥааһыннаах илин-кэлин түсүһүү түмүгэр карбюратордаах массыыналарга “Модун” хамаанда иккис бириистээх миэстэҕэ тигистэ.
Иккис түһүмэх – “Спринт” дэнэр тыытыллыбатах тоҥуу хаарынан 500 миэтэрэ уһуҥҥа сүүрдүү. Этэргэ диэри, киһи уйана-хатана биллэр тургутуута. Манна “Дьураа Хара” диэн Мэҥэ Хаҥалас хамаандатын кэнниттэн “Модун” эмиэ иккис миэстэҕэ тахсан, үөртэ. Бу экипаж үһүс түһүмэххэ тоҥуу хаарынан 1500 миэтэрэ уһуҥҥа сүүрдүүгэ эмиэ сүрүн утарылаһааччыта “Дьураа Хара” кэнниттэн биэтэккэ иккиһинэн кэллэ.
“УАЗ-Экстрим” биир сонун түһүмэҕэ – экипажтары улуустарынан буолбакка, холбоон булкуйан сүүрдүү. Манна араас улуустартан кэлбит дьон бэйэ-бэйэлэригэр эрэнэн, уопсай биир тыыҥҥа киирэллэр. Биирдии хамаандаҕа 4 экипаж (2 инжектордаах, 2 карюратордаах массыына) киирэн, уопсайа аҕыс хамаанда кытынна. Бу түһүмэххэ Курбуһахтан “Баат” экипаж киирбит хамаандата иккис миэстэҕэ тигистэ.
Уопсай түмүккэ алта очкону ылан, муҥутуур кыайыылаах аатын аҕалаах уол хамаандата – Ариан Барашков суоппардаах, Степан Барашков штурманнаах Тумултан “Модун” экипаж ылан, Уус Алданнар өрөгөйбүт үрдээтэ. Кыайылаахха 50 тыһ.солк. уу харчынан туттарылынна. Ариан Семенович Суһал көмө суоппарынан үлэлиир, уола Степа – улахан кылаас үөрэнээччитэ.
Курбуһахтан “Баат” хамаанда үһүс бириистээх миэстэҕэ тигистэ. Састаап суоппара Попов Егор Петрович эмиэ Суһал көмөҕө суоппардыыр, штурмана Стручков Александр Иванович – урбаанньыт.
Миэстэлэспит экипажтар сыаналаах бириистэри, мэтээллэри, кубоктары туттулар.
“Мүрү” автокулууп.