Ааспыт 2024 сыл түмүгүнэн А.Р. Халдеева аатынан модельнай сельскэй библиотека аатыттан бастыҥ ааҕааччыларыгар сертификаттары, бэлэхтэри туттарда. Бу туһунан библиотекарь Светлана Прудецкая кэпсээтэ:
– Алын сүһүөх кылаастарга “Бастыҥ ааҕар кылаас” анал аатынан Тумул орто оскуолатын 3-с кылааһын үөрэнээччилэрэ, кылаас салайааччыта Варвара Петрова, “Саамай көхтөөх кылаас ” анал аатынан Тумул орто оскуолатын 8-с кылааһын үөрэнээччилэрэ, кылаас салайааччыта Анастасия Поротова, “Ситиһиилээх бастыҥ кылаас” аатынан Тумул орто оскуолатын 11-с кылааһын үөрэнээччилэрэ, кылаас салайааччыта Николай Васильев бэлиэтэннилэр. “Сыл бастыҥ ааҕааччытынан” Тумул орто оскуолатын 3-с кылааһын үөрэнээччитэ Амелия Лексякуна буолла. Библиотека көхтөөх ааҕааччылара Амелия, Виталий Петровтары эмиэ бэлиэтээтибит.
2025 сылы көрсө уонна инбэлииттэр декадаларын чэрчитинэн нэһилиэкпит олохтооҕо, айылҕаттан талааннаах Евдокия Тютрина уус-уран оҥоһуктарын быыстапката А.Р. Халдеева аатынан нэһилиэк библиотекатыгар турда, ааҕааччылар араас матырыйаалтан оҥоһуллубут оҥоһуктары сэргээн көрдүлэр. Оҕо сааһыттан доруобуйатынан хааччахтаах Евдокия Степановна иллэҥ кэмин туһалаахтык атаарар, уруһуйдуур, кумааҕыттан араас оҥоһуктары кырыйар, араас матырыйаалтан оҥоһуктары оҥорор, нэһилиэк библиотекатыгар быыстапкаҕа иккис төгүлүн ситиһиилээхтик кыттар, онон киниэхэ “Көмүс тарбахтаах маастар” анал сертификаты туттардыбыт.
Улууспутугар ааҕар балаҕантан саҕалаан бастакы норуодунай библиотека төрүттэммитэ 100 сыллаах үбүлүөйүнэн уонна Бороҕон нэһилиэгин сельскэй библиотекатыгар 50-ча сыл таһаарыылаахтык үлэлээбит СР култууратын туйгуна, Уус Алдан улууһун норуотун маастара, Уус Алдан улууһун уонна Бороҕон нэһилиэгин бочуоттаах олохтооҕо Анна Халдеева аатын үйэтитэн чугас аймахтара Халдеевтар, Алексеевтар, Дьячковскайдар убаастыыр эдьиийдэрин сырдык аатын үйэтитэн А.Р. Халдеева аатынан сельскай модельнай библиотекаҕа 30 000 сууммалаах харчынан бэлэх оҥордулар. Халдеевтар аймах нэһилиэк библиотекатыгар өрүү спонсордыыллар, күүс-көмө буолалларыгар махталбыт муҥура суох. Эһиэхэ Үүнэр 2025 сыл үгүс элбэх ситиһиилэри аҕаллын, үтүө санааҕыт үрдүккэ кыттаатын, дьон-сэргэ махталын, ытыктабылын ыла турун.