Биһиги төрөппүттэрбит Анна Ивановна уонна Андрей Андреевич Аммосовтар үйэлэрин тухары оҕону үөрэтиигэ уонна иитиигэ үтүө суобастаахтык үлэлээбиттэрэ. Биһиги, бииргэ төрөөбүттэр, күндү дьоммут аатын үйэтитэн 2016 сылтан саҕалаан 10-с сылбытын эдэр сылдьан үулэлээбит оскуолаларыгар, ийэбит дойдутугар Таатта улууһун Өксөкулээх Өлөксөй аатынан Дьохсоҕон орто оскуолатын уонна дойдубутугар Н.Н. Окоемов аатынан Курбуһах орто оскуолатын выпускниктарыгар, түмүктэммит үөрэх дьылыгар үлэлэригэр бастыҥ ситиһиилээх учууталларга биир кэмнээх бириэмийэ олохтоон, сыл аайы Тиһэх чуораан бырааһынньыгар туттарабыт.
Оскуола выпускниктарыгар – педагог үөрэҕэр барар оҕоҕо диэн анаан туттаран кэллибит. Бу сылларга стипендиат оҕолорбут сорохторо үөрэхтэрин бүтэрэн, этэҥҥэ ситиһиилээхтик үлэлии сылдьалларын үөрэ истэбит,онтон сорохтор өссө даҕаны үөрэнэ сылдьаллар. Быйыл бириэмийэбитин үөрэх сылын түмүгүнэн бастыҥ үлэлээх учууталларга туттардыбыт. Ол курдук Курбуһах орто оскуолатыгар нуучча тылын уонна литературатын үөрэтэр улуус биир бастыҥ учуутала, учууталлар династияларын салҕааччы Екатерина Аммосоваҕа анаатыбыт. Оттон Тааттаҕа бастыҥ учуутал Лариса Попова тутта, кини – дириэктэри үөрэх чааһыгар солбуйааччы, эдэр кэскиллээх салайааччы.
Манна даҕатан эттэххэ, Дьохсоҕон оскуолата аҕыйах хонуктааҕыта РФ Гранын ылбыта. Онон ыам ыйын 24 күнүгэр чаҕылхай күннээх сарсыарда дьоммут ааттара үлэлээбит оскуолаларыгар доргуччу ааттанна. Оттон биһиги, бииргэ төрөөбүттэр, астына, долгуйа үөрэбит.
Мария Аммосова, уопсас. кэрэсп. Бороҕон