Балаҕан ыйын маҥнайгы күнүгэр өрөбүл күн түбэһэринэн, быйыл Билии күнэ 2-с чыыһылаҕа буолла. Сахабыт сиригэр Байаҕантай нэһилиэгэ түөрт Геройдааҕынан биллэн-көстөн, суон-сурахтанан, аата-суола дорҕоонноохтук ааттанар. Россия үлэҕэ геройа М.Н. Готовцев аатын сүгэр Танда орто оскуолатыгар Билии күнэ оруобуна Аҕа дойду улуу сэриитигэр хорсун быһыыны көрдөрөн Герой буолбут киэн туттар, холобур оҥостор Геройбут Владимир Деонисович Лонгинов күн-сирин көрбүт күнүгэр түбэһэн сөхтөрдө. Быйыл Геройбут 105 сааһын бэлиэтиэхпит.
Самаан сайыммыт бүтэн, уһун сынньалаҥмыт түмүктэнэн тапталлаах оскуолабытыгар муһуннубут. 2024-2025 үөрэх сылын 80 үөрэнээччи үөрэ-көтө көрүстэ. Бу күҥҥэ ыалдьыттарынан буоллулар – Уус Алдан улууһун баһылыга Василий Аммосов уонна үөрэх управлениетын начальнига Степан Литвинцев.
Тэрээһиммит үөрүүлээх чааһа хас сылын ахсын буоларын курдук, үөрэнээччилэр учууталларынаан парадтарынан, быйыл оскуоланы бүтэрэр үөрэнээччилэр Россия былааҕын өрө көтөҕөн таһаарыыларынан, Россиябыт, Сахабыт сирин, Уус Алдаммыт улууһун өрөгөй ырыаларынан саҕаланна.
Иитэр үлэҕэ директоры солбуйааччы Саргылаана Петухова 2024-2025 сылга үөрэххэ ылыы бирикээһин билиһиннэрдэ. Саҥа суумка сүгэн, сибэкки дьөрбөтүн тутан аан маҥнай оскуола боруогун атыллыыр үс кырачаан уол оҕону төрөппүттэрэ сиэтэн киллэрбиттэрин ытыс доҕуһуолунан көрүстүбүт.
Оскуолабыт директора, ыалдьыттар, нэһилиэкпит аҕа баһылыгын солбуйааччыта Артем Сивцев, оскуолаҕа “Кэнчээри” уһуйаантан сирдээн аҕалбыт иитээччилэрэ Саргылана Готовцева, оскуоланы бүтэрэр выпускниктар эҕэрдэ тыллары этэн, сэмэй бэлэхтэрин туттартаатылар.
Үөрүүлээх линейкабытыгар 50 сыл аннараа өттүгэр оскуолабытыттан кынат анньынан олох киэҥ аартыгар үктэммит 1974 сыллаахха бүтэрбит выпускниктар кэлэннэр тэрээһиммитин киэргэттилэр. Кинилэртэн оскуолабытыгар 25 сыл директорынан үлэлээбит Надежда Егорова эҕэрдэ тылын анаата. Бу выпускниктартан 9 киһи төрөөбүт дойдулара сайдарын туһугар өр сылларга харыс да сири халбарыйбакка үлэлээн-хамсаан кэллилэр, кинилэр үөрэммит кыһаларыгар 2 олорор скамейка бэлэх уунаннар, оҕолорго патриотическай тыыны киллэрэр өйдөбүл хаалларан холобур буоллулар. Бэлиэтээн эттэххэ, бу кылаастан Надежда Егорова, Марфа Ноговицына, Любовь Турантаева учуутал идэтин баһылаан, үөрэммит оскуолаларыгар өр кэмҥэ оҕо иитиитигэр бэйэлэрин кылааттарын киллэрбиттэрэ, өссө биир герой үүнэн тахсарыгар төһүү күүс буолбуттара.
Түгэнинэн туһанан, оскуолабыт директора Константин Готовцев Марфа Ноговицынаҕа Россия Федерациятын Президенэ Владимир Путин бочуоттаах грамотатынан наҕараадаламмытынан эҕэрдэлээтэ итиэннэ Саха Өрөспүүбүлүкэтин Ил Түмэнин бэрэссэдээтэлин бастакы солбуйааччыта Александр Жирков эҕэрдэ суругун туттарда.
Бу үөрүүлээх күҥҥэ маҥнайгы кылааска киирэр оҕолорбут төһө да аҕыйахтарын иһин, хомоҕой хоһооннорун ааҕан, музыка нарын доҕуһуолунан ылбаҕай ырыаларын бэлэхтээн, олус чобуоларын көрдөрдүлэр.
Үөрэнээччилэр оскуола ветеран учууталларыгар, саҥа педагогическай үлэлэрин саҕалыыр педагогтарга сибэкки дьөрбөтүн туттардылар итиэннэ 8 кылаас үөрэнээччитэ Снежана Готовцева ырыатын бэлэх уунна.
Үлэтин саҥа саҕалыыр педагог Дуолан Никифоров маҥнайгы Билиитин күнүн иилээн ыытан дьон кэрэхсэбилин ылла.
Салгыы чуораан тыаһынан маҥнайгы кылаас оҕолоро уонна быйыл оскуоланы бүтэрэр 11 кылаас үөрэнээччилэрэ Билии уруоктарыгар ыҥырдылар. Тэрээһиммит үөрүүлээх чааһа хаартыскаҕа түһүүнэн түмүктэннэ.
Тускун Кыыhа Айылгылаана, оскуола интернатын иитээччитэ.