И.С. Портнягин аатынан Сыырдаах орто оскуолатыгар Уус Алдан улууһун сокуоннай саастарын ситэ илик оҕолорго аналлаах социальнай-реабилитационнай киин (сал. Иннокентий Сергеев) исписэлиистэрэ уонна социальнай партнердара «Барыта дьиэ кэргэн туһугар» социальнай десанынан ыалдьыттаатылар.
Бу күн Уус Алдан улууһун сокуоннай саастарын ситэ илик оҕолорго аналлаах социальнай-реабилитационнай киин үлэтин көрдөрөр быыстапка турда, исписэлиистэр бэйэлэрин үлэлэрин хайысхатынан интэриэһинэй лекциялары, бэсиэдэлэри тэрийдилэр, итини таһынан элбэх оҕолоох ыалынан сылдьан, биирдиилээн төрөппүттэрдиин көрсөн кэпсэтэн, сүбэ биэрэн бардылар.
Ону тэҥэ Уус Алдан улууһун сокуоннай саастарын ситэ илик оҕолорго аналлаах социальнай-реабилитационнай киин дириэктэрэ Иннокентий Сергеев, Бэрт Ууһун нэһилиэгин баһылыга Илья Ильин уонна И.С. Портнягин аатынан Сыырдаах орто оскуолатын дириэктэрэ Иван Портнягин инникитин бииргэ үлэлэһиигэ үс өрүттээх сөбүлэҥ түһэрсиигэ илии баттастылар.
Бу курдук нэһилиэктэргэ сылдьан оҕолору, төрөппүттэри кытта сирэй көрсөн араас хайысхаларынан тустаах кыһалҕалары истии, сырдатар үлэ, профилактика уустук үлэтигэр сүбэ-ама биэрии, оҕолор өттүлэриттэн буруйу оҥоруу, бэрээдэги кэһии тахсыбатын туһугар, оҕону иитиигэ төрөппүт эппиэтинэстээх буолуутун үрдэтиигэ араас хайысханан квалифицированнай көмөнү – социальнай, медицинскэй, педагогическай, психологическай өҥөлөрү оҥорон тэрийии олус наадалаах диэн санааҕа кэллибит. Тоҕо диэтэххэ, төрөппүт, үлэһит эрэ барыта күннэтэ улуус киинигэр тустаах тэрилтэҕэ кыһалҕатын быһаарса киирбэт. Онон маннык социальнай десаннары тэрийэн миэстэтигэр көрсүһүү, кыһалҕаны быһаарыы олус наадалаах диэн түмүктээтибит.
Ньургуяна Хорунова, иитэр үлэҕэ дириэктэри солбуйааччы