Биир дойдулаахпыт Дүпсүн ыччата Спиридон Иванов “Кыһын Саха сириттэн саҕаланар” фестиваль чэрчитинэн Москваҕа норуот хаһаайыстыбатын ситиһиилэрин быыстапкатыгар (БСНХСБ) хомус оҥоруутугар уонна хомуска оонньуурга маастар-кылааһы ыытан кэллэ. Спиридон түһүлгэтигэр олус элбэх киһи кыттыбыт. Хомуһун оҥоро олорон, сотору буолаат хомуска оонньоон дьүрүһүтэн барарын кэлбит эрэ киһи барыта сөҕө-махтайа көрбүт.
Спиридон Дүпсүн нэһилиэгин олохтоохторо, биэс оҕолоох Мария Спиридоновна, Алексей Альбертович Ивановтар дьиэ кэргэттэрин улахан оҕолоро. 2013 сыллаахха Дүпсүн хомусчут уолаттарын “Кэскил” ансаамбылыгар киирэн уһуйуллубута. Онно хомустуурга үөрэнэн, онтон 14 сааһыттан хомуһу бэйэтэ чочуйан таһаарар маастарга диэри үүннэ. Хомуһу оҥоруу бастакы олуктарын 2016 сыллаахха Ньурба улууһун Ариан Афанасьев диэн маастарыттан билбитэ.
Дьиэ кэргэн эрэлэ Спиридон үөрэҕин республикатааҕы лицей-интернакка көһөн салҕаабыта. Манна үөрэнэ сылдьан “Кэскил” хомусчуттар ансаамбылларын салайааччыта Мария Соловьева билиһиннэриитинэн хомус ууһун Роман Готовцевы кытта билсибитэ. Талааннаах уол бу маастарга дьиҥ-чахчы чочуллан, хомуһу оҥоруу маастарыстыбатыгар толору үөрэммитэ. Билигин хомуһу иллэҥ кэмигэр сакаас киирдэҕинэ оҥорор. Итиэннэ айар-тутар киһи иэйиитэ киирэриттэн үчүгэй хомус чочуллара эмиэ тутулуктаах.
Быйыл сайын Өймөкөөн улууһугар ыытыллыбыт Олоҥхо ыһыаҕар төрөөбүт улууһун делегациятын кытта барсан, хомус уустарын күрэһигэр бастыыры ситиспитэ.
Спиридон Иванов лицей-интернатын 2018 сыллаахха бүтэрбитэ. Онтон ХИФУ физика-техническэй институтун радиофизик идэлээх ситиһиилээхтик түмүктээбитэ, салгыы магистратураҕа киирбитэ. Магистратураҕа аныгы технология “машинное обучение и искусственный интеллект” диэн эйгэни үөрэтэр. Ону сэргэ үөрэммит лицей-интернатыгар робототехника куруһуогун тьютерынан үлэлиир.
Бу курдук улууспут талааннаах ыччата киэҥ эйгэҕэ бэйэтин сатабылын, төрүт үгэһи сайыннарар үлэтин-хамнаһын көрдөрөн кэлбитинэн киэн туттабыт. Кэскиллээх ыччаппыт бу үөрүйэҕин өссө сайыннаран, үрдүк ситиһиилэри дабайан истин. Итиэннэ үтүө үөрүйэҕин кэлэр кэнчээри ыччакка уһуйан, аата ааттаннын, талааннаах саханы үксэттин.
Ольга Шепелева