Оройуон үрдүнэн 2024 сыл 8 ый түмүгүнэн 43 оҕо уонна 31 төрөппүт учуокка турар, оттон былырыыҥҥы 2023 сылга 8 ый түмүгүнэн 27 сокуоннай сааһын туола илик оҕо уонна 33 төрөппүт учуокка турара.
Төрөппүт сүрүннээн аһыы утаҕы иһэн, учуокка турбут буоллахтарына, оҕолор өттүлэриттэн буруйу кэһии арааһа элбэх. Холобур, ымсыырар санааттан малы-салы уоруу, итирдэр утаҕы иһии, түүнүн сылдьан туора дьон дьиэтигэр көҥүлэ суох киирии, араас көрүҥнээх эт-хаан эчэйиитин таһаарыы, суоппар ыытар бырааба суох уруулга олоруу уонна да атыттар.
Бу кэһиилэр сүрүн биричиинэлэринэн – дьиэ кэргэн иһигэр оҕону иитии сөптөөхтүк ыытыллыбата, оҕо бэйэтэ билэринэн көҥүл сылдьыыта, төрөппүтү истибэт буолуута, оскуолаҕа үөрэҕин кэнниттэн эбии дьарыга суоҕа, араас секцияларга, куруһуоктарга сылдьыбата буолар.
Оройуон үрдүнэн быйыл 8 ый түмүгүнэн араас административнай кэһиилэри оҥорон 22 оҕо учуокка ылылынна, бу көрдөрүү былырыын 27 этэ. Быйыл оҕо холуобунай буруйу оҥоруута тахсыбата. Былырыын 8 ый түмүгүнэн 4 оҕо арыгы иһэн баран улахан киһиэхэ эт-хаан эчэйиитин таһааран, ону таһынан суоппар ыытар бырааба суох уруулга олорон холуобунай эппиэтинэскэ тардыллыбыта.
Сокуоннай сааһын туола илик оҕону кытта үлэлиир хайысха сотрудниктарынан 8 ый түмүгүнэн административнай буруйу кэһиигэ уопсайа төрөппүккэ 136, сокуоннай саастарын ситэ илик о5олорго 5 боротокуол толорулунна. Олор истэригэр: арыгы иһиитэ, киһини эчэтии, күлүгээннээһин уонна оҕо түүн уулуссаҕа сылдьыыта киирдэ. Сокуоннай сааһын туола илик оҕону арыгы иһиигэ кучуйуутун, оҕону кытта бииргэ арыгылааһынын иһин аҕыс улахан киһиэхэ боротокуол толорулунна.
Хас биирдии сокуоннай сааһын туола илик оҕо, ханнык баҕар көрүҥнээх буруйу оҥордоҕуна, Россия ИДьМ 2013 сыл алтынньы 15 күнүгэр тахсыбыт 845 №-дээх бирикээһигэр олоҕуран, ПДН-ҥа учуокка ылыллар. Учуокка турбут оҕону кытта иитэр-үөрэтэр үлэ полиция эрэ иһинэн ыытыллыбат. Манна оҕо быраабын көмүскүүр уонна кинилэр дьыалаларын көрөр комиссия чилиэннэрэ, психологтар, улуустааҕы сокуоннай саастарын ситэ илик оҕолорго аналлаах социальнай-реабилитационнай киин, улуустааҕы эпиэкэ уонна сокуоннай саастарын ситэ илик оҕолор бырааптарын көмүскүүр уорган үлэһиттэрэ, оскуола социальнай педагога, иитэр-үөрэтэр үлэҕэ дириэктэри солбуйааччы бары биир ситимнээх үлэни ыыталлар. Участковайдар бу оҕолор төрөппүттэрин кытта үлэни тиһигин быспакка ыыталлар.
Сокуоннай саастарын ситэ илик учуокка турбут оҕолор ортолоругар от ыйын 18 күнүттэн 21 күнүгэр диэри “Тайҕа геройа” байыаннай-полевой өрөспүүбүлүкэтээҕи күрэх буолбута. Манна Уус Алдантан хамаанда хомуллан, онно кыттан, 1 миэстэни ылары ситистилэр. Атырдьах ыйыгар «Биир ньыгыл Россия» баартыйа ыыппыт «Оҕону оскуолаҕа тэрий» аахсыйатыгар Уус Алдан улууһун отделын сокуоннай саастарын туола илик оҕолор дьыалаларын көрөр подразделениета кыттан, 4 дьиэ кэргэн 9 оҕотугар бэлэх туттарда.
Убаастабыллаах төрөппүттэр, оҕоҕут күннээҕи бэрээдэги тутуһан сылдьарын, эбии дьарыктаах, чөл туруктаах уонна бэрээдэктээх буоларын туһугар үлэлэһэргитигэр ыҥырабыт. Оҕо бэрээдэктээх буолуута, куһаҕан дьаллыкка убаммата – биһиги үлэбит сүрүн ирдэбилэ.
Уус Алдан улууһун Ис дьыалаҕа отделын сокуоннай саастарын ситэ илик оҕо сулууспатын отделениетын старшай инспектора, полиция капитана Петр Степанов.