ИДьМ Уус Алданнааҕы отделын полиция учаастактааҕы боломуочунайдарын уонна сокуоннай саастарын ситэ илик оҕолор сулууспаларын отделениетын сүрүн үлэтэ улуус нэһилэнньэтин кытары буолар. Биирдиилээн киһиттэн, оҕо саадыттан саҕалаан тэрилтэлэри уонна уопсастыбаннаһы кытта олус киэҥ хабааннаах үлэ барар. Ол курдук саа-саадах хонтуруола, транспорт бэрэбиэркэтэ, нэһилиэнньэни бүттүүн кэрийэн сэрэтэр үлэни ыытыы, дьон быраабын уонна интэриэһин кэһиини көмүскээһин, административнай уонна холуобунай буруйдар тахсыбаттарын туһугар сэрэтэр хайысхалаах тоһуур дьайыылар буолаллар. Биллэрин курдук арыгы иһиитин уонна атыытын, айылҕаҕа дьиикэйдик үүнэр наркотическай веществолаах ньыманы туттуу, туһаныы утары үлэлэр тиһигин быспакка ыытыллаллар.
2024 сыл бастакы кварталыгар улууспутугар Россия ИДьМ уонна Саха республикатын ИДьМ иһинэн араас хабааннаах оперативнай сэрэтэр операциялар буолан аастылар. Ол курдук «Быт», «Нелегальный мигрант», «Лес», «Профилактика», «Сообщи, где торгуют смертью», «Арсенал» операциялар ыытылыннылар. Бу операциялар сүрүннээн сэрэтэр хайысхалаах буолаллар. Бу үлэ түмүгүнэн нэһилиэнньэҕэ элбэх сэрэтии үлэтэ ыытылынна, араас брошюралар тарҕатылыннылар. Билиҥҥи аныгы үйэ сайдыытын туһанан, интернет ситимин нөҥүө дьонтон үбү-харчыны түөкүннээн ылыы күүскэ сайынна. Холобур, суотабай телефонунан эрийэн тиийэн, өйдөрүн баайан, элбэҕи эрэннэрэн, итэҕэлгэ киирэн, киһи банковскай дааннайын билэллэр, ууруна сытар харчытын уораллар. Ону тэҥэ телефоҥҥа хачайдаммыт араас сыһыарыыларга смс-сурук, «Ватсап» социальнай ситим нөҥүө ссылка ыыталлар. Онно «Аймах оҕобор куоластааҥ» диэн араас ис хоһоонноох көрдөһөр ссылканан киирэн, бэйэҕит бас билэр аккауҥҥутун алдьаттараҕыт, онуоха түөкүттэр сотовай телефоҥҥутун бас билэллэр, бэйэлэрин көрүүлэринэн көҥүл тутталлар.
Онон сэрэтиэхпитин баҕарабыт! Өскөтүн билбэт нүөмэргититтэн эрийдэхтэринэ тута эппиэттээбэккэ, бу суотабай нүөмэр кимиэхэ сыһыарыылааҕын көрөр «ГЕТКОНТАКТ» приложение нөҥүө ким эрийбитин көрөн баран биирдэ кэпсэтиэххэ наада. Бас билэр баан картаҕыт дааннайын хаһан даҕаны туора дьоҥҥо этимэҥ. Билбэт сайтаргытыттан сөбүлүү көрбүт малгытын сакаастыыртан туттунуҥ, сэрэхтээх уонна болҕомтолоох буолуҥ!
Николай Михайлов, Россия ИДьМ Уус Алданнааҕы отделын участковайдарын уонна сокуоннай саастарын ситэ илик оҕолор инспекцияларын отделениетын начальнигын эбээһинэһин толорооччу, полиция лейтенана