Уус Алдан улууһа 1930 сыллаахха тохсунньу 9 күнүгэр олохтоммута. Олорор, үөрэнэр, үлэлиир тапталлаах улууспут төрүттэммитэ 95 үбүлүөйдээх сылын туолла. Бу бэлиэ күҥҥэ сөп түбэһиннэрэн олохтоохтортон улуустарынан ордук туох иһин киэн тутталларын уонна инникигэ ыра санааларын ыйыталастыбыт.
Василий НОВОПРИЕЗЖАЙ, Тумул бөһүөлэгин олохтооҕо:
– Улууспут элбэх геройдааҕынан киэн туттабын. Үлэһит дьонноох буолан, элбэх геройдаах буоллаҕа. Спорт сайдыытыгар, Саха сиригэр спорт хамсааһынын тэрийбит сүдү киһибитинэн Николай Тарскай аатынан киэн туттабын. Улууспутунан өссө киэн туттарбыт туһугар нэһилиэктэринэн арааран туран улууспут улуу ийэлэригэр аналлаах сквер тутуллуон баҕарабын.
Арсен ГОТОВЦЕВ, Танда орто оскуолатын 11-с кылааһын үөрэнээччитэ:
– Биһиги улууспут элбэх геройдааҕынан киэн туттабын. Аҥаардас, биһиги дьоҕус нэһилиэкпититтэн түөрт Герой үүнэн тахсыбыта: гражданскай сэрии Геройа Г.В. Егоров, Аҕа дойду Улуу сэриитин Геройа В.Д. Лонгинов, Үлэ Албан аат орден толору кавалера, Россия үлэҕэ Геройа М.Н. Готовцев уонна байыаннай дьайыы хорсун кыттыылааҕа, Россия Геройа А.М. Неустроев. Кинилэр туохха да тэҥнэммэт хорсун быһыыларын холобур оҥостобун. Биһиги тыа хаһаайыстыбатынан дьарыктанан олорор улуус буолар. Онон баҕа санаам: алаастарбытыгар, сыһыыларбытыгар толору хороҕор муостаах, сыспай сиэллээх мэччийэ сылдьар буолуон баҕарабын. Сүөһүлээх, астаах буоллахпытына, үлэ да, сайдыы да баар буолуо дии саныыбын. Быйылгы сылы улууспут салалтата Тыа хаһаайыстыбатын сылынан биллэрбитин олус биһирээтим.
Олег ЧЕРЕПАНОВ, Мүрү 1-гы №-дээх орто оскуолатын 11-с кылааһын үөрэнээччитэ:
– Мүрү алааһа аан дойду үрдүнэн саамай улахан алаас буолара, улууспутугар тоҕус геройдаахпыт киэн туттууну үөскэтэр. Сэһэн Ардьакыап Екатерина II ыраахтааҕыга тиийэн саха омугун туһугар улахан боппуруостары туруорсубута өбүгэлэрбит туһунан элбэҕи этэр. Улууспут киинэ үгүс тутуунан киэркэйдэ, ордук «Майаҕатта Бэрт Хара» стадион тутуллубута үөрдэр. Итиэннэ өрөспүүбүлүкэҕэ соҕотох Дүпсүҥҥэ баар Космонавтика мусуойунан, күн бүгүҥҥэ диэри ыллыы-туойа сылдьар Россия үтүөлээх образцовай «Кэнчээри» ансаамбылынан киэн туттабын. Кэнэҕэһин да биһигиттэн элбэх суруйааччы, биллэр-көстөр дьон, общественнай диэйэтэл тахсара буоллар үчүгэй буолуо этэ.
Эрсан БОРИСОВ, Уһун Күөл ыччата, култуура колледжын 2-с кууруһун устудьуона:
– Былыр-былыргыттан номоххо кэпсэнэр улуу дьонноохпут. Күүстээх-уохтаах Майаҕатта Бэрт Хараттан саҕалаан спорт хамсааһынын тэрийсибит Николай Тарскай, Лөгөй Тойонтон, Сэһэн Ардьакыаптан саҕалаан, Степной Думаны төрүттэспит Иван Мигалкин курдук муударай дьоммутунан, Бороҕон улууһун аар-саарга аатырдыбыт Дмитрий Говоров – Олоҥхоһут Миитэрэйтэн саҕалаан ыллыы-туойа сылдьар «Кэнчээри» ансаамбыллаахпытынан киэн туттабын. Ити курдук хайа да эйгэҕэ күөн туттар улуу дьонноохпут. Инникитин өссө да талааннаах, билиилээх ыччат тахса туруохтарын, хас биирдии бөһүөлэкпититтэн саҕалаан улууспут киинэ сайда, киэркэйэ туруон баҕарабын!
Мария Аргунова