Кэнники кэмҥэ күн-дьыл туруга үгүстүк мунаардар, соһутар буолла. Бу кыһыммытын да ылан көрдөххө, өргө диэри хаара чараас эрээри, олус сылаас кыһын буолан соһутта. Бу туһунан улууспут дьоно туох санаалаахтарый?
Мария ФОМИНА, Мүрү нэһилиэгин олохтооҕо:
– Урукку айылҕаны уонна билиҥҥини хайдах да тэҥнээбэккин. Айылҕабыт сүрдээҕин уларыйда. Бу кыһын наһаа сылаас буолла. Урут кыраадыс кэтиирбитин олох өйдөөбөппүн, кыһын буолла да, тымныы буолуохтааҕын курдуга. Билигин күнү-дьылы сылыктыыр уустук, айылҕа бэйэтэ эрэ билэр тугу көрдөрөрүн. Сайын этиҥ чаҕылҕан билиҥҥи курдук күүстээх буолбат этэ.
Афанасий КОПЫРИН, Мүрү нэһилиэгин олохтооҕо:
– Ааспыт нэдиэлэ сымнаһыар күннэриттэн үгүс дьон соһуйбутун туһунан эттилэр. Урут да итинник сымнаһыар күннэр буолаллар этэ ээ. Мин оскуолаҕа үөрэнэр сылларбар буолбутун өйдүүбүн. Кэлин, үлэһит буолбутум кэннэ, 80-с сыллар бүтүүлэригэр дуу, 90-с сыллар саҥаларыгар дуу тохсунньуга 16 кыраадыс тымныы буолла диэбиттэрин өйдүүбүн. Кырдьык, ол кэнниттэн өтөр-наар маннык сымнаһыар күннэр буола иликтэр. Онон дьон умна быһыытыйбыттара буолуо. Оттон маннык нэдиэлэни быһа сымнаһыар күннэр буолбуттарын өйдөөбөппүн, бэркэ гыннар икки-үс күн буолар этэ.
Анна БУРНАШЕВА, Мүрү нэһилиэгин олохтооҕо:
– Тохсунньу торулуур тымныыта, ордук таҥха кэмигэр саамай муҥутуур тымныы турар диэн өйдөбүллээхпин. Кыра эрдэхпинэ эбэм Матрена Михайловна: «Сэрии буола турдаҕына, 1944 сыллаахха, тохсунньуга наһаа сылаас буолан абыраммыппыт ээ. Тыаттан сыарҕалаах оҕуһунан мас-от тиэйэн аҕаларыгар ийэҥ барахсан айылҕаҕа махтанара, ол иһин өйдөөн хаалбыппын», – диэн кэпсиирэ. Ол төһө сылаас буолан хас кыраадыс сылыйбытын, ол саҕана билээхтээбэт буоллахтара, арай тыҥ хатыыта үргэл сулуһунан уонна саҥа ый тахсарынан билэллэрин истэр буоларым. Кэнники кэмҥэ айылҕа түргэнник уларыйда, күһүнэ уһун, сылаас буолар буолла. Сайын күн баарыгар итии, оттон күн киирдэ да, олус сөрүүн буолан хаалар. Биир дьиктитэ – кыра ытыс саҕа былыттан, күн көрөн турдаҕына, ардах кылгас бириэмэҕэ наһаа омуннаахтык курулаччы кутар дии. Өссө арыт халлааны хайытар чаҕылҕана сүрдээх уонна, олох да таммах да самыыры түһэрбэккэ, баран хаалар буолла.
Сардаана СТРЕКАЛОВСКАЯ, Тумул бөһүөлэгин олохтооҕо:
– Мин 2018 с. «Күннүк» күнү-дьылы кэтээн көрүү дневнигин атыыласпытым. Онтон ыла күнү-дьылы кэтээн көрөбүн. Быйыл дьикти кыһын буолла. Бары улуустарга сылаас халлаан турда. Бу маннык сыл 2008 сыллаахха бэлиэтэммит. 2024 с. сэтинньи ыйга саамай муҥутаан тымныйбыта Ааннаах Хоту-дьаамҥа -50°С. Саамай халыҥ хаардаах Бүлүү Халбаакытыгар 40-50 см. халыҥ хаар. Ахсынньыга олох сылаас турда. Муҥутаан тымныйбыта -30°С,-33°С. Оттон 2025 с. тохсунньуга 1, 2, 3 күннэригэр-60°С,-61°С тымныйа сырытта. Тохсунньу 8 күнүттэн эмиэ халлааммыт сылыйан -30°С эрэ буолан, алта күн устата турда.
Мария Аргунова