Кэрэ аҥаардар күннэрин көрсө биир дойдулаахпытын кытта кэпсэтиибиттэн үллэстиим. Киһи олоҕо биир тэҥ уу-нуһараҥнык устубат эбээт. Билигин Россия Геройун тапталлаах кэргэнэ, биэс оҕо амарах ийэтэ буолан олорор Октябрина Дмитриевна оҕо сааһа чэпчэкитэ суохтук саҕаламмыта.
Кыыс аҕата Дмитрий Васильевич Яковлев Суотту нэһилиэгиттэн төрүттээҕэ, Октябрина олох кыра эрдэҕинэ олохтон туораабыта, ийэтэ Мэҥэ Хаҥалас Маттатыттан төрүттээх Зинаида Николаевна эмиэ бу олохтон барбыта 10 сыл буолбут. Октя игирэ аҥаара эбит, игирэтин аҥаара, хомойуох иһин, эмиэ кыра сааһыгар суох буолан, кыыс куруук туох эрэ улахан сүтүктээх, итэҕэстээх курдук сананан улааппыт.
«Хайдах эрэ икки киһи олоҕун олоро сатыыр курдугум… – диэн Октябрина кэпсээнин саҕалаата. – Оҕо сааһым төрөөбүт дойдубар Суоттуга ааспыта. Сэттис кылааска диэри Суотту орто оскуолатыгар үөрэммитим. Үөрэхпэр үчүгэй этим, ордук төрөөбүт тыл, төрүт култуура, физкультура уруогун сөбүлүүрүм. Оскуоланы бүтэриэхпэр диэри сүүрүүнэн дьарыктаммытым. Оскуола кэннэ Дьокуускайга иис үөрэҕэр үөрэммитим.
Кэргэммин кытта мин Бороҕоҥҥо олорор кэммэр 2018 сыллаахха кулун тутар 1-гы күнүгэр билсибиппит. Биэс оҕолоохпут: икки уол, үс кыыс. Улахан уолум быйыл оскуоланы бүтэрэр. Айгылаан – кыра эрдэҕиттэн сытыы-хотуу, оскуола көхтөөх үөрэнээччитэ. Кинитэ суох арааһа биир да тэрээһин буолбата буолуо. Бэйэтэ фокуһунан дьарыктанар, ол иһин ыҥырыыттан-ыҥырыыга сылдьар. Улахан кыыһым – 9-с, орто кыыс – 4-с, кыра уол 3-с кылааска үөрэнэллэр. Кыра кыыс билигин дьиэҕэ олорор.
Кэргэним киһи быһыытынан олох үчүгэй – оҕону кытта оҕо, кырдьаҕаһы кытта кырдьаҕас. Туох да үлэттэн толлон турбат, сытыы-хотуу, саҥалаах-иҥэлээх. Кинини көрсүбүппүн дьылҕам бэлэҕинэн ааҕабын.
Оҕо иитиитигэр, ордук уол оҕоҕо, аҕа иитиитэ улахан суолталаах. Аҕабыт улахан уолу 5-с кылаастан үлэҕэ сыһыаран, окко-маска тэбис-тэҥҥэ илдьэ сылдьар. Онон икки уолум ааттаах трактористар диэххэ сөп. “Аҕабыт – Герой” диэн түөскэ охсуммаппыт. Сахалыы сэмэйдик ылынабыт. Ол эрээри аҕабыт үөрүүтүн үллэстэбит, оҕолорум оҕо-оҕо курдук үөрэллэр-көтөллөр.
Түмүкпэр этиэм этэ: сахабыт дьоно бэйэ-бэйэҕитин убаастааҥ, өйдөһүҥ-өйөһүҥ. Бары доруобай, дьоллоох буолуҥ!».
Ити курдук Октябрина Дмитриевна сүтүктээх оҕо сааһын улахан дьиэ кэргэнинэн толорон билигин дьоллоох ыал ийэтэ буолан олорон санаатын сайаҕастык үллэстибитигэр үөрэбит, махтанабыт.
Мария Аргунова