Бэҕэhээ, сэтинньи 24 күнүгэр, биир дойдулаахпыт, биллиилээх салайааччы, спортивнай, физкультурнай хамсааhыны тэрийээччи Николай Тарскай төрөөбүтэ 100 сылын көрсө Уус Алдан улууһун Н.Н. Тарскай аатынан Баатаҕай орто оскуолата улуус оскуолаларын алын сүһүөх кылаастарын үөрэнээччилэригэр акробатика күрэхтэһиитин тэрийэн ыытта. Бастакы маннык тэрээhин Н.Н. Тарскай төрөөбүтэ 95 сылын кѳрсѳ ыытыллыбыта.
Бу бэлиэ күн сарсыардата кэлбит ыалдьыттары алаадьынан, итии чэйинэн күндүлээhининэн саҕаланна. Күрэхтэһии кылаабынай судьуйата, педагогическай үлэ ветерана Николай Николаев уонна кылаабынай сэкирэтээрэ, Баатаҕай оскуолатыгар иитэр үлэҕэ дириэктэри солбуйааччы Любовь Копырина мандатнай хамыыһыйаны ыыттылар. Манна регистрация, жребий, сүбэ мунньах буолла. Оҕолору кытыннара илдьэ кэлбит улуус оскуолаларын хамаандаларын салайааччылара күрэхтэһии судьуйаларынан буоллулар. Ол курдук, кыргыттарга физкультура учууталлара Сардаана Старостина (МСОШ-2), Евдокия Рожина (Мындааба), Семен Поисеев (Суотту), Саргылана Афанасьева (Уhун Күѳл), уолаттарга ДЮСШ тренерэ, ОБЖ учуутала Ян Готовцев (Баатаҕай), физкультура учууталлара Анна Копырина (Сыырдаах), Андрей Бурнашев (Орто Эбэ), Саина Сивцева (МСОШ-1). Оттон сэкирэтээрдэринэн оҕо түмcүүтүн салайааччыта, баhаатай Амелия Сивцева (Баатаҕай), алын сүhүѳх учуутала, библиотекарь Сардаана Слепцова (Баата5ай) сатабыллаахтык салайан күрэхтэһиини үрдүк таhымҥа ыыттылар.
Кырачаан ыалдьыттарбыт уонна кинилэр салайааччылара Н.Н. Тарскай аатынан «Спорт албан аата» музейга оскуола директора Алеанна Бурнашева экскурсиятын сэргээн көрдүлэр-иһиттилэр, киэн туттар киhибит Николай Николаевич Тарскай, Баатаҕай нэhилиэгин, оскуолатын туhунан билиилэрин хаҥаттылар.
Күрэхтэһии үөрүүлээх быһыыга-майгыга аһыллыытыгар кыттааччылар парадтарын, Тарскай олоҕун уонна үлэтин сырдатар «Уолан» бѳлѳх монтаhын (сал. В.И. Сивцева), пирамиданы, спортивнай үҥкүүлэри (сал. М.А. Горохова) кѳрѳѳччүлэр дохсун ытыс тыаhынан арыаллаатылар. Үөрэх улуустааҕы салалтатын начаалынньыгын солбуйааччы Иван Никонов, нэһилиэк баһылыга Михаил Белолюбскай, оскуола директора Алеанна Бурнашева, педагогическай үлэ ветерана Николай Николаев эҕэрдэ тыл эттилэр.
Өссө бу күнтэн Николай Тарскай үбүлүөйдээх сылыгар «Махтал, Учууталга» тэрээhиннэри ыытыыга кѳмѳ аахсыйа биллэрилиннэ. Онон тэрилтэлэр, общественнай түмсүүлэр салайааччыларын, депутаттары, биир дойдулаахтарбытын, улуус, өрөспүүбүлүкэ олохтоохторун бу аахсыйаҕа кѳхтѳѳхтүк кыттаргытыгар ыҥырабыт. Оттон бастакы сэмэй кылаат – 8315 солкуобай бу күн оскуола остолобуойугар тэриллибит минньигэс астан, кыттааччылартан киирдэ.
Күрэхтэһиигэ улууспут 10 оскуолата (Баатаҕай, Лѳгѳй, Уhун Күѳл, Мүрү 1-кы уонна 2-с NN-дээх, Мындааба, Чараҥ, Сыырдаах, Орто Эбэ, Суотту), ол иһигэр алта толору хамаанда, 39 кыттааччы акробатикаҕа күөн көрүстүлэр, күрэс былдьастылар.
Онуоха күрэхтэһии түмүгэ маннык буолла:
— 1-2 кылаас кыргыттарыгар:
1-кы миэстэ – 10 бааллаах Сайынаара Куо Аммосова (Мүрү-1); 2-с миэстэ – 9,6 бааллаах Камила Петухова (Лөгөй); 3-с миэстэ – 9,3 бааллаах Камила Гоголева (Баатаҕай).
— 1-2 кылаас уолаттарыгар: 1-кы миэстэ – 10,3 бааллаах Артем Белолюбскай (Баатаҕай); 2-с миэстэ – 9,5 бааллаах Саргылаан Копырин (Уһун Күөл); 3-с миэстэ – 8,9 бааллаах Эрсан Третьяков (Мындааба).
— 3-4 кылаас кыргыттарыгар: 1-кы миэстэ – 10,5 бааллаах Милана Гуляева (Мүрү-2); 2-с миэстэ – 9,1 бааллаах Варя Черемкина (Орто Эбэ); 3-с миэстэ – 8,9 бааллаах Алена Жиркова (Уһун Күөл).
3-4 кылаас уолаттарыгар:
1-кы миэстэ – 10,7 бааллаах Егор Гоголев (Баатаҕай); 2-с миэстэ – 10,3 бааллаах Егор Старостин (Мүрү-1); 3-с миэстэ –10 бааллаах Эрхан Готовцев (Мүрү-2).
Хамаанданан түмүккэ 3-с миэстэни Мүрү 1-кы N-дээх орто оскуолатын, 2-с миэстэни – Баатаҕай, 1-кы миэстэни – Мүрү 2-с N-дээх орто оскуолата ылан кыайыы ѳрѳгѳйүн биллилэр.
Тэрээһин сабыллыытыгар Николай Тарскай аатын үйэтитиигэ олоҕун анаабыт педагогическай үлэ ветерана Ксения Румянцева эҕэрдэ тыл эттэ, 6-с кылаас үөрэнээччитэ Сандаара Колесова хомуска оонньоото, оскуола директора Алеанна Бурнашева махтал суруктары, судьуйалар кыайыылаахтарга наҕараадалары туттардылар.
Кырачаан кыттааччыларбыт үөрэн-көтөн, ыалдьыттарбыт махтанан дьиэлэригэр айаннаатылар. Аны биэс сылынан акробатикаҕа улуустааҕы III күрэхтэһиигэ кыттар оскуола ахсаана ѳссѳ элбииригэр, кыттааччы таhыма үрдүүрүгэр диэн баҕа санаабытын тиэрдэбит. Николай Николаевич Тарскай олоҕо, үлэтэ ыччакка сирдиир сулус, үтүѳ холобур буола турдун!
Туяра Самсонова, Н.Н. Тарскай аатынан Баатаҕай орто оскуолатын директоры үѳрэх чааhыгар солбуйааччы, саха тылын, литературатын учуутала.