Быйылгы оонньуу кылаабынай судьуйатынан Мэҥэ- Хаҥалас ыччата Николай Семенов үлэлиир. Кини анал байыаннай дьайыы кыттыылааҕа, «Эр санаа» уордьан кавалера, СӨ үөрэҕириитин туйгуна, РФ ДОСААФ тэрилтэтин Саха сиринээҕи салаатын бэрэссэдээтэлин солбуйааччы. Николай Семенов үрдүк менеджер идэлээх, иккис үрдүк үөрэҕинэн ОБЖ учуутала, кэргэннээх, 2 кыыс оҕолоох.
Николай Мирославович Ф.К. Попов аатынан Баатара орто оскуолатыгар учууталлыыр кэмигэр 2016 сыллаахха оскуола кадет кылааһын салайан өрөспүүбүлүкэтээҕи «Снежный барс» күрэхтэһиигэ кытыннарбыта. Хамаанда кыайыылаах аатын ылбыта. 2017 сыллаахха Московскай уобаласка ыытыллыбыт Бүтүн Арассыыйатааҕы «Победа» байыаннай-спортивнай күрэхтэһиигэ дойду 63 регионнарыттан кэлбит хамаандалартан III миэстэҕэ тахсары ситиспиттэрэ. Николай Мирославович Майаҕа киэһээҥҥи оскуолаҕа иитэр үлэҕэ завуһунан, үөрэх управлениетын кылаабынай специалиһынан үлэлээбитэ.
2022 сыл балаҕан ыйыгар баҕа өттүнэн Ийэ дойду көмүскэлигэр туруммута. 14-с анал биригээдэ састаабыгар киирэн разведчик быһыытынан хорсуннук сэриилэспитэ. Василий Даниловтыын алтынньы ыйга билсибиттэрэ. Хамандыырдара лейтенант Владислав Костаровскай бааһыран, Василий Данилов хамаанданы бэйэтин илиитигэр ылбыта. Суруналыыс, суруйааччы Сергей Москвитин «Я в тылу не останусь» кинигэтигэр Николай Семенов ДНР Павловка сэлиэнньэтин таһыгар Василий Данилов бүтэһик кыргыһыытынтуһунан ахтыы суруйбута. Доҕорун Василий Даниловы күндүтүк саныыр, хорсун, модун санаалаах киһинэн ааҕар. Николай Семенов бааһыран байыаннай госпиталларга эмтэнэн баран 2023 сыл тохсунньуга дойдутугар төннүбүтэ.
Кылаабынай судьуйа Николай Семеновтан күрэхтэһии туһунан тус санаатын ыйыппыппар маннык хоруйдаата:
— 2023 сыллаахха «Кыайыы-2023» оонньууга ыалдьыт быһыытынан анал бириистэрдээх кэлэ сылдьыбытым. Күрэхтэһии тэрээһинэ тупсан иһэр, Дьокуускайтан тиийэ кэлэн кытта сылдьаллар. Быйылгы күрэхтэһии 8 этабынан ыытыллар. Ураты, саҥа көрүҥүнэн «Ратные страницы истории Отечества» этап киирбит. Кыттааччылар Аҕа дойду Улуу сэриитин, Украинаҕа ыытыллар АБДь, Василий Данилов олоҕун туһунан боппуруостарга эппиэттиэхтэрэ, билиилэрин тургутуохтара. Дойду историятын, хорсун быһыы үтүө холобурун билэр эрэ буоллахтарына оҕолорго киэн туттуу санаата үөскүөҕэ. Байыаннай-спортивнай оонньуулар үөрэнээччилэр өй-санаа, эт-хаан өттүнэн сайдалларыгар, патриоттуу тыыны иитиигэ оруоллара улахан.
Елена Сыроватская, уопсас. кэрэсп.