Аҕыйах хонуктааҕыта СӨ Ил Дарханын кубогар биир дойдулаахпыт Николай Бурнашев бэрт ситиһиилээхтик кытынна. Бу күрэхтэһии Россия кубогын түһүмэҕэ буоларын быһыытынан, олус үрдүк таһымнаах уонна улахан маастардар кыттыылаах барар.
Күрэхтэһии сэттис тууругар Николай гроссмейстер Наталья Погонинаны кыайан, тэрийээччилэри да, кыттааччылары улаханнык соһутта. Бастакы разрядтаах саахымаччыт гроссмейстеры сирэй көрсөн кыайара диэн сүүстэн биир түгэн буолуон сөп. Бу сонун социальнай ситимнэргэ тахсаатын кытары Николайга эрийэн тиийэ сылдьыбытым эрээри, турнир бүттэҕинэ кэпсиэм диэн буолумматаҕа. Маннык улахан турнирга бастакытын кыттар уонна гроссмейстеры кыайбыт киһи долгуйбута да буолуо.
Николай – Бороҕон төрүт олохтооҕо. Онон Уус Алдан саахымакка оскуолатын ааттатааччы буолар. Күрэхтэһиигэ кыттыбытын туһунан маннык кэпсээтэ:
– Маннык улахан таһымнаах күрэхтэһиигэ бастакыбын кыттабын. Онон долгуйуу да баара. Састаап олус күүстээх этэ. Мин икки гроссмейстеры, үс маастары кытары оонньоотум. Онно биир гроссмейстеры, биир маастары кыайаммын, уопсай түмүккэ үһүс миэстэ буоллум. Онон ситиһиибиттэн олус үөрэн сылдьабын. Бэтэрээннэргэ оонньоотум.
Оттон Погонинаны кытары оонньуурга бириэмэни сүтэрбэккэ, дебюттан тэҥҥэ тахсар соругу туруорбутум. Ол кэннэ оонньуу хайдах салаллан барарыттан кыахпынан оонньуом дии санаабытым. Онтукайым табыллан, тиһэҕэр кыайан таҕыстым. Оонньуубут уһуна 1,5 чаас этэ.
Николай бу ситиһиитинэн улуус саахыматын историятыгар аатын сурунна. Урукку өттүгэр Уус Алдантан маастар таһыма суох киһи гроссмейстеры сирэй көрсөн кыайбытын билбэппин.
Аны саахыматы сэҥээрээччилэргэ Николай кыайыылаах партиятын хайдах оонньообутун туһанан бэйэтэ быһаарыылаах суруйан ыыппытын билиһиннэрэбит:
Наталья Погонина – Николай Бурнашев. 7-с тур.
13Ce Kf4 бу сиэртибэ буолбатах, көннөрү атастаһыы буолар. 14gf Ф:h4 15feC;e5+ 16f4 C:c3 17C:c5 C:b2 18Лb1 Cg7 19Cd4 C:d4 20Ф:d4 b6. Ити барыта кэриэтэ форсированннай хаамыылар кэннилэриттэн мин ордук пешкалаах хааллым. 21e5? Ити сыыһа хаамыы кэнниттэн маҥаннар балаһыанньалара лаппа мөлтүүр. 21…de 22Ф:e5 Лae8 23Фg5 (Ф:c7? C:h3 24Лb2C:g2+ 25Кр:g2 Ле3 харалар кыайаллар) 23…Ф:g5 24fg Ле2 25c5 Cf5 26Лbe1 Лfe8 27Л:e2 Л:e2 28Kpg3 28…bc 29Лf4 Л:a2 30Лc4 Лс2 31Лa c4 ити хаамыы саамай боростуой кыайыыга тиэрдэр. 32Л:a5 c3 33Лc5 Лc1 34Л:c7 c2 35d6 Лd1 36d7 Л:d7 0-1/
Афанасий Сектяев