Улууспут успуорка кэмитиэтин саҥа салайааччыта Евгений Алексеев бүгүн нэһилиэктэргэ успуорду көҕүлээччилэри (спортинструктор) кытары көрүстэ. Мунньахха улуус баһылыгын солбуйааччы Анатолий Сторожев, улуус бэтэрээннэрин Сэбиэтин бэрэссэдээтэлэ Олег Федоров кыттыыны ыллылар.
Бастатан туран, бэтэрээннэр улуустааҕы спартакиадаларыгар кыттыы боппуруоһун дьүүллэстилэр. Манна инструктордар кыттааччы бэтэрээн быһыытынан сааһа туолуохтаах күнүнэн-ыйынан буолбакка, сылыгар үктэммитинэн буолара ордук этэ диэн туруорустулар. Ол эрээри, өрөспүүбүлүкэҕэ күнүнэн-ыйынан быһааралларынан, боппуруос салгыы дьүүлгэ хаалла.
Улуус баһылыгын солбуйааччы Анатолий Сторожев билигин маассабай успуордунан Арассыыйа нэһилиэнньэтин 55 %-нын, оттон 2030 сылга 75 %-нын хабар ирдэбил турарынан, нэһилиэктэргэ успуорт саалаларыгар үлэни күүһүрдэллэригэр баҕатын тиэртэ. «Онон нэһилиэктэргэ успуорт саалаларын бары көрүҥнэрэ нэһилиэнньэ сылдьарыгар аһаҕас буолалларын ситиһии соруга баарын инструктордар эрэ буолбакка, нэһилиэктэр салалталара эмиэ өйдүөхтээхтэр», – диэн бэлиэтээтэ.
Кэлэр сыл Арассыыйаҕа Успуорт сылынан биллэриллиэхтээҕинэн, өрөспүүбүлүкэҕэ саха успуорда туругурарыгар улахан өҥөлөөх Н.Н. Тарскай төрөөбүтэ 100 сыла бэлиэтэнэринэн маассабай успуорду өссө көҕүлүүр баҕалаах тарҕастылар.
Афанасий Сектяев