Мүрү нэһилиэгэр ааспыт сыл түмүгүн таһаарар үөрүүлээх тэрээһин буолла. 2024 сыл Мүрү нэһилиэгэр Инфраструктураны сайыннарыы сылынан биллэриллэн уонна улууска Аҕа, Саха сиригэр Оҕо саас, Россияҕа Дьиэ кэргэн сылынан араас хабааннаах үлэ ыытыллыбытын көрдөрөр видеоролигынан саҕаланна. Үөрүүлээх чааһы “Кэнчээри” образцовай народнай ансаамбыл нэһилиэкпит Өрөгөй ырыатын толорон арыйда.
Мүрү нэһилиэгин дьаһалтатын баһылыга Прокопий Румянцев эҕэрдэ тылы этэн туран, нэһилиэк сайдыытыгар үгүс сыралаах олохтоохтору наҕараадалаата, олор истэригэр «Мүрү нэһилиэгэ социальнай-экономическай сайдыытыгар кылаатын иһин» бэлиэнэн СӨ норуотун уус-уран идэ маастара, Уус Алдан улууһун норуотун маастара Марфа Васильева, Мүрү нэһилиэгин дьаһалтатын суоппара Николай Васильев, сокуоннай саастарын ситэ илик оҕолору социальнай-реаблитациялыыр киин иитээччитэ Зоя Сивцева, бу киин социальнай үлэҕэ исписэлииһэ Мария Готовцева, социальнай управление социальнай үлэһитэ, нэһилиэк депутата Марфа Атласова, налог сулуупатын бэтэрээнэ Виктор Мылахов наҕараадаланнылар. Итиэннэ өр кэмҥэ үлэлээбит, нэһилиэк олоҕор көхтөөх кыттыччылар махтал суругунан бэлиэтэннилэр.
Салгыы эҕэрдэ тылы улуус баһылыга Василий Аммосов эттэ уонна улуус социальнай-экономическай сайдыытыгар кылаатын, үтүө суобастаах үлэтин иһин урбаанньыт Борис Лугиновка улуус дьаһалтатын бочуоттаах грмотатын туттарда. Онтон нэһилиэк депутаттарын Сэбиэтин бэрэсэдээтэлэ Олег Федоров эҕэрдэлээтэ уонна байыаннай дьайыыга сырдык тыынын толук уурбут Гаврил Попов кэргэнигэр Айна Поповаҕа “Аҕа дойду көмүскээччитин кэргэнэ” РФ мэтээлин туттарда.
Тэрээһин күүтүүлээх чааһыгар Мүрү нэһилиэгин 2024 сыл араас эйгэҕэ бастыҥнарын ааттаатылар. Ол курдук 2024 сыл түмүгүнэн “Олох-дьаһах, коммунальнай хаһаайыстыба бастыҥ үлэһитэ” – ДьУоКХ слесара Лоокуут Колодезников, “Доруобуйа харыстабылын бастыҥ үлэһитэ” – киин балыыһа лабораторнай технигэр Сардаана Неустроева, “Оскуола иннинээҕи үөрэхтээһин бастыҥа” – “Мүрүчээнэ” оҕо тэрилтэтин музыкальнай салайааччыта Луиза Бурнашева, “Үөрэхтээһин бастыҥ үлэһитэ” – Мүрү 1№ орто оскуолатын биология учуутала Федора Бурнашева, “Культура эйгэтин бастыҥ үлэһитэ” – Мындааба сынньалаҥ киинин уус-уран салайааччыта, билигин “Кэнчээри” оҕо саадын иитээччитэ Ирина Иванова, “Социальнай сулууспа бастыҥ үлэһитэ” – улуус социальнай харысхалга уонна үлэҕэ управлениетын дьиэҕэ көмөнү оҥоруу отделын сэбиэдиссэйэ Валентина Федорова, “Мүрү нэһилиэгин бастыҥ үөрэнээччитэ” – Мүрү 1-гы №-дээх орто оскуолатын 11-с “б” кылааһын үөрэнээччитэ Максим Оконешников, “Бастыҥ общественник” – “Маяк” түөлбэ салайааччыта Елена Гоголева, “Мүрү нэһилиэгин бастыҥ спорстмена” – баһаары утары сулууспа этэрээтин караулун начальнига Афанасий Саввин, “Мүрү нэһилиэгин бастыҥ бэтэрээн-спортсмена” – Мүрү 1-гы №-дээх орто оскуолатын харабыла Василий Решетников, “Бастыҥ урбаанньыт” – «555» кафе, маҕаһыын, бэкээринэ хаһаайката Сардаана Портнягина, “Нэһилиэк инфраструктуратын сайыннарар бырайыактары үлэҕэ киллэрии бастыҥа” – Н.Н.Окоемов аатынан “Мүрү кытыла” тутуу прораба Степан Прокопьев буоллулар.
Салгыы Мүрү дьаһалтатын баһылыгын солбуйааччыта Вероника Сивцева 2024 сыл түмүгүнэн Мүрү нэһилиэгин түөлбэлэрин салайааччыларыгар махтал суруктары уонна анал сертификаттары туттарда. Итиэннэ түөлбэлэр икки ардыларыгар сыллата ыытыллар үгэскэ кубулуйбут комплекснай күрэс кыайыылаахтарын наҕараадалаата. Онно үһүс бочуоттаах миэстэни “Мүрү” түөлбэ (сал.Анна Игнатьева), иккис миэстэни “Мындааба” түөлбэ (сал. Саргылана Готовцева), бастакы миэстэни “Маяк” түөлбэ (сал.Елена Гоголева) ситиһэн үрдүк сыанаҕа бэлиэтэннилэр.Ону тэҥэ Прокопий Федотович Мүрү нэһилиэгин түөлбэлэрин үлэтигэр кэккэ сылларга көхтөөхтүк кыттар бастыҥ дьоммутугар нэһилиэк дьаһалтатын аатыттан анал сертификаттары туттарда итиэннэ кини түмүккэ үүммүт 2025 сыл Мүрү нэһилиэгэр Тупсаҕай эйгэни тэрийии сылынан биллэрбитин иһитиннэрдэ. Үөрүүлээх тэрээһин Сахабыт сирин биллэр ырыаһыттара Ирена Файрушина, Умсуура, Инвент кэнсиэрдэринэн түмүктэннэ.
Мария Аргунова