Мүрү 1 нүөмэрдээх оскуолатын 9 «б» кылааһыгар (кыл. сал. Люция Бурцева) анал байыаннай дьайыыга аналлаах «Эр санаа холобура» аһаҕас кылаас чааһа ыытылынна.
Байыаннай дьайыыга сылдьан хорсуннук охтубут биир дойдулаахпыт, Өнөр нэһилиэгин ыччата, «Эр санаа» уордьанынан бэлиэтэммит Евдоким Ушницкай, Бороҕонтон баран сэриилэһэ сылдьар үс оҕолоох аҕа Иван Замятин тустарынан ахтыы уонна видео матырыйаал нөҥүө билсиһии, санаа атастаһыыта буолла.
Евдоким Ушницкай оскуолаҕа үөрэнэ сылдьан
Оскуола музейын үлэһитэ Елена Сыроватская байыаннай дьайыы туһунан киирии тылын кэнниттэн Евдоким Ушницкай туһунан чугас балта, кылаас үөрэнээччитэ Карина Захарова иһитиннэриитэ, Евдоким оҕо сааһын, кылгас олоҕун туһунан хаартыскалартан таҥыллыбыт видео баар дьон сүрэхпитин кымаахтыы тутта, долгуйуу, хомолто иэйиитэ хам ылан харахпыт ууланан ылла.
Евдоким Ушницкай 2000 сыллаахха Марианна Ивановна, Семен Семенович Ушницкайдар дьиэ кэргэннэригэр бастакы оҕонон төрөөбүтэ. Мындааба оскуолатыгар быстах кэмҥэ үөрэнэн тустуунан дьарыктаммыта.
10-с кылаас кэнниттэн Дьокуускайга автодорожнай техникумҥа, ол кэннэ промышленнай техникумҥа үөрэнэн токарь идэтин баһылаабыта. 2021 сыллаахха ХИФУ Илиҥҥи норуоттар тылларын уонна култуураларын институтугар туттарсан киирбитэ.
Ити сыл Хабаровскайга аармыйаҕа сулууспалыы барбыта. 2022 сыл бэс ыйыгар хантараак түһэрсэн байыаннай дьайыыга аттаммыта. Түөрт ый устата тохтоло суох хорсуннук сэриилэспитэ. Херсон уобалаһын Шевченко сэлиэнньэтигэр буолбут кыргыһыыга олох кэрэтин, үчүгэйин ситэри билбэккэ сырдык тыына быстыбыта.
Сэргэх, бэһиэлэй уолчааны дьоно таптаан Кимчик диэн ыҥыраллара. 21 эрэ сааһыгар кыргыһыы хонуутугар охтубут Кимчик бары билэр дьонун сүрэҕэр сөҥөн хааллаҕа…
Аһаҕас кылаас чааһыгар мобилизациянан сэриигэ ыҥырыллыбыт Иван Замятин олоҕун аргыһа, кэргэнэ Алена Васильевна кэпсээнин бары да долгуйа иһиттибит. Иван Афанасьевич бу олунньуга аҕыйах күн уоппускаҕа кэлэн сынньанан баран төттөрү чааһыгар тиийээт фронт инники кирбиитигэр киирбит. Биир дойдулаахпыт этэҥҥэ эргиллэн кэлэригэр баҕардыбыт.
Оҕолор эр санаалаах биир дойдулаахтарын туһунан иһийэн олорон иһиттилэр. Евдоким Ушницкай кэриэһигэр чүмэчи уматан сөҥүөрэн турдулар. Ыччат Евдоким Ушницкай аата ааттана туруоҕа диэн туран Эйэ холуубун көтүттүлэр.
Елена Сыроватская, уопсас. кэрэсп.