Быйылгы үөрэх сылыгар оскуола үлэтигэр саҥа сүүрээнинэн Санкт- Петербург куоракка баар Арассыыйа бастакы Президенэ Борис Ельцин аатынан бибилэтиэкэ тиһигэр киирэн тэйиччиттэн олорон холбонон үлэлиир кыах үөскээһинэ буолла. Улуус оскуолаларын бибилэтиэкэлэриттэн бастакынан бу тиһиккэ оскуола бибилэтиэкэтэ киирбитэ чахчы да бэлиэ түгэн буолар.
Педагог уонна уһуйааччы сылын түмүктэниитигэр аналлаах нэдиэлэ иккис күнүгэр Президент бибилэтиэкэтигэр тэйиччиттэн холбонон үлэ саҕаланыытын биллэрдилэр.
Б.Н. Ельцин аатынан Президент бибилэтиэкэтэ 2009 сыл ыам ыйын 27 күнүгэр аһыллыбыта. Ситим нөҥүө бу бибилэтиэкэни кытта үлэлииргэ кыах бэрилиннэ. Оскуола бибилэтиэкэтигэр үлэлиир усулуобуйа тэрилиннэ, ол курдук үс киһи тэҥинэн олорон үлэлиир миэстэтэ оҥоһулунна.
Үлэҕэ старт бэриллиитин үөрүүлээх чааһыгар үөрэх управлениетын начаалынньыгын солбуйааччы Иван Никонов, оскуола администрацията, учууталлар, 9 «б» кылаас үөрэнээччилэрэ кыттыыны ыллылар. Бэлиэ күҥҥэ кыһыл лиэнтэни үөрэх управлениетыттан Иван Никонов, оскуолаттан дириэктэр Игорь Сивцев, педагог бибилэтиэкэр Люция Бурцева кырыйдылар.
Оскуола дириэктэрэ Игорь Сивцев:
– Дойдубут сүрүн, улахан бибилэтиэкэтигэр холбонон манна олорон үлэ саҕаланна. Бибилэтиэкэ картотекатын кытта түргэн ньыманан үлэлииргэ үөрэнии, туһааннаах литэрэтиирэни булуу, бэйэ билиитин сөптөөх информациянан хаҥатыы бу ситим нөҥүө барыаҕа. Учууталлар, үөрэнээччилэр үлэ, үөрэх өттүнэн эбии дьарыктаныыларыгар толору кыах бэрилиннэ, – диэн тоһоҕолоон бэлиэтээтэ.
Үөрэх управлениетын начаалынньыгын солбуйааччы Иван Никонов:
– Бүгүн оскуолаҕа чахчы да суолталаах күн үүннэ. Мөлүйүөнүнэн фондалаах бибилэтиэкэни кытта үлэ улууспут саамай элбэх оҕолоох сүрүн оскуолатыттан саҕаланна. Бибилэтиэкэҕэ сылдьыҥ, туһаныҥ, билиигитин хаҥатыҥ, – диэн баҕа санаатын тириэртэ.
Дириэктэри иитэр үлэҕэ солбуйааччы Алексей Мигалкин кинигэ хайа да кэмҥэ билии төрдө буоларын этэн туран мустубут 9 «б» кылаас үөрэнээччилэригэр, учууталларга туһаайан инникитин бибилэтиэкэ өҥөтүнэн туһаныыга дьоһун үктэл оҥоһуллубутун бэлиэтээн туран айымньылаахтык үлэлииргэ ыҥырда.
Педагог бибилэтиэкэр Люция Бурцева:
– Бу тиһиккэ оскуола холбонуута үлэбитигэр саҥа таһымҥа тахсыы буолар. Күн бүгүн өрөспүүбүлүкэттэн 58 точка холбонон олороруттан улууспутуттан улуустааҕы киин бибилэтиэкэ уонна биһиги оскуолабыт бааллар. Үлэлииргэ көҥүл бэриллибититтэн үөрэбит. Маны ситиһээри үгүс үлэни көрүстүбүт, бырайыактары суруйан көмүскээн, биһирэбили ылан, сэтинньи 20-24 күннэригэр оскуолаттан Диана Дмитриевналыын иккиэн өрөспүүбүлүкэ 42 киһилээх бөлөҕөр киирэн үөрэнэн кэллибит. Кууруспут 72 чаастан турар. Ол иһиттэн кэлиҥҥи 2 нэдиэлэҕэ кэтэхтэн үөрэннибит. Түмүккэ ону туоһулуур дастабырыанньа ыллыбыт. Иннибитигэр былааннаах үлэ турар.
Бибилэтиэкэр Диана Гаврильева ЦУД (центр удаленного доступа) киирэн электроннай каталогынан хайдах үлэлииргэ маастар-кылаас көрдөрдө. Конституционнай быраап диэн тиэрмиҥҥэ Президент бибилэтиэкэтин матырыйаалларыттан 823 тыһ. тахса испииһэк көстөн кэллэ. Бу маннык улахан источниктан сөптөөҕү булан ылыыга туһалаах сүбэни биэрдэ. Биир бэйэм көрө олорон чахчы да олус көмөлөөх үлэ буолууһу дии санаатым. Тугу баҕарбыккын электроннай бибилэтиэкэттэн булан ааҕар, билсэр усулуобуйа оскуолабытыгар олохтонно.
Елена Сыроватская, уопсас. кэрэсп.