Оскуолабытыгар СВО кыттыылаахтара, оскуолабыт выпускниктара Андрей Карпов, Владислав Татаров уонна Бээрийэттэн төрүттээх Роман Ноговицын кэлэн, оскуола 8-11 кылаас уолаттарын кытта көрүстүлэр.
Икки сэрии кыттыылааҕа Андрей Карпов уолаттарга туһаайан олоххо араас буоларын, эр киһи араас очурдарга түбэһэрин, онон барытыгар бэлэмнээх буолуоххутун наада диэн эттэ. Оттон Роман Ноговицын туох барыта кыраттан саҕаланар, бэйэҕит дьиэ кэргэҥҥиттэн саҕалаан дьоҥҥо болҕомтолоох буолуҥ, ийэлэргитин, аҕаларгытын харыстааҥ, спордунан дьарыктаныҥ, телефону быраҕан, үлэҕэ эриллэн улаатыҥ диэн эттэ.
Байыастар уолаттарга бэрээдэги тутуһуҥ, тулуурдаах буолуу хаачыстыбатын бэйэҕитигэр билиҥҥиттэн көрүнүҥ диэн сүбэлээтилэр уонна туруоруммут сыалгытыгар иннигит хоту баран иһиҥ диэн эттилэр. Ыалдьыттарбыт уолаттарга сэрии алдьархайын туһунан, онно тулуурдаах, хорсун уонна куттаһаҕа суох киһи сатаан сылдьарын тоһоҕолоон эттилэр.
Коля Оллонов, юнкор, 9 «а» кылаас үөрэнээччитэ