Бүгүн Мүрү 1 нүөмэрдээх орто оскуолатын музейыгар Найахыттан София Гоголева–Голикова ыалдьыттаата. Анал байыаннай дьайыыга сылдьан 2022 сыл сэтинньи 1 күнүгэр олохтон туораабыт тааҥка батальонун отделениетын хамандыыра младшай сержант Голиков Николай Леонидович туһунан «Өрүкүйэр сүрэҕэ өрүү инники» кинигэни оскуолаҕа бэлэхтээтэ.
Николай Голиков 2002 сыл алтынньы 4 күнүгэр Найахыга олохтоох Леонид, София Голиковтар дьиэ кэргэннэригэр төрөөбүтэ. Ийэтэ София Петровна бастакы кэргэниттэн Коля иннинээҕи үс оҕото улаатан бары үлэһит, ыал дьон буолбуттара. Улахан кыыһа Аина Чирикова Үөһээ Дьааҥы улууһун Адыаччы орто оскуолатыгар учуутал, бибилэтиэкэр. Кэргэннээх, түөрт оҕолоох. Кыра кыыс Алтаана Шадрина эмиэ ыал ийэтэ, Нам Хамаҕаттатыгар олорор, уһуйааҥҥа физкультура инструктора. Улахан уол Святослав Гоголев Булуҥ улууһугар Тиксиигэ ФСБ-га сулууспалаабыта, идэтинэн юрист этэ, киниттэн биир оҕо хаалбыта. Оттон Коля Голиков ыал кырата этэ эрээри атаахтык тутуллубакка иитиллибитэ. Кыра сааһыттан үлэни-хамнаһы сатыыр, эппиэтинэстээх, бэйэтин кыанар буола улааппыта.
София Петровна кыра уолун туһунан маннык ахтар:
– Коля 2021 сыллаахха Найахыга биир кэлим эксээмэннэрин туттараат, аттестаатын илиитигэр да ылбакка, 18 сааһыгар аармыйаҕа сулууспалыы барбыта. Сыл аҥаарын кэнниттэн үс сылга байыаннай хантараакка илии баттаабыта, байыаннай олоҕо саҕаламмыта. Бастакы үс ыйыгар таҥас ыскылаатыгар начаалынньыгы солбуйааччынан, оттон байыаннай таһаҕастар ыскылааттарын начаалынньыгын солбуйааччынан сылдьыбыта. Бу үлэтигэр эппиэтинэстээҕин көрдөрөн, младшай сержант званиетын ылбыта. Салгыы тааҥка батальонугар отделение хамандыыра буолбута. Саҥа сулууспалыы кэлбит уолаттары аармыйа олоҕор үөрэтэрэ. Тылга дьоҕурдаах, эт-хаан өттүнэн бэлэмнээх буолан, өрүү инники буолара, хайҕалга сылдьыбыта.
Анал байыаннай дьайыыга хорсуннук сэриилэспитэ. Сибээскэ бэйэтэ эрэ тахсара, үксүн киэһэ 10 чааска кэпсэтэрэ. Эрдэ контузиялана сылдьыбытын кистээбитэ. Кэлин билбиппит. Коля 20 эрэ сааһыгар Ийэ дойду туһугар олоҕун толук уурбута. «Эр санаа» уордьанынан наҕараадаламмыта.
Найахы орто оскуолатыгар Коляҕа аналлаах муннук аһыллыбыта, хоһооннор айыллыбыттара. 2024 сыл олунньу ыйыгар кылааһын салайааччыта, математика учуутала Агата Тегюрюкова, оскуола дириэктэрин иитэр үлэҕэ сүбэһитэ Евдокия Фомина кинигэ матырыйаалын бэлэмнээһиннэринэн биллэр суруналыыс Майя Власьева эрэдээктэрдээн 120 экземплярынан «Өрүкүйэр сүрэҕэ өрүү инники» кинигэ күн сирин көрдө. Кинигэни билиһиннэрии Найахы орто оскуолатыгар ыытыллыбыта. Онон ийэ быһыытынан кинигэ тахсыытыгар бары үлэлэспит дьоҥҥо махтанабын.
Кэпсэтиибит түмүгэр түөрт оҕо ийэтиттэн, алта сиэн эбэтиттэн София Петровнаттан уолаттара сулууспалыы сылдьар ийэлэргэ анаан тугу этиэҥ этэй диэбиппэр, чочумча олоро түһэн баран: «Уолаттаргытын харыстааҥ, өйөөҥ, бэйэҕит күүстээх санааланыҥ, эрэлгитин ыһыктымаҥ», – диэтэ. Ийэ киһи ис сүрэҕиттэн эппит тыллара хас биирдии ийэҕэ тиийдиннэр. Эйэлээх олох эргийдин!
Елена Сыроватская, уопсас. кэрэсп.