Ааспыт нэдиэлэ бээтинсэтигэр Мүрү 1-гы N-дээх орто оскуолатыгар өрө күүрүүлээх күргүөмнээх тэрээһин буолан ааста. Сыл аайы ыытыллар күһүҥҥү ас-үөл быыстапка-дьаарбаҥката тэриллэн, оҕо аймах, улахан да дьон оҕолуу үөрдүлэр. Бэл көмүс күһүн туран биэрэн, күнүн утаҕынан күлүмүрдэтэ угуттаан, сылаас күнү бэлэхтээн үөрүүнү үксэттэ.
Оскуола таһын киэҥ былаһаакката томточчу ас-үөл тардыллыбыт остуолларынан толору туолан, киһи барытын сатаан да ситэн көрбөт киэҥ атыыта тэрилиннэ. Кылаастар салайааччылара, төрөппүттэр оҕолорунаан кыһаллан туран ас эгэлгэтин астаан аҕалан атыыга туруордулар. Манна эт, бурдук ас арааһа, айылҕа бэрсибит сирин аһыттан барыанньа, утах, хомпуот, о.д.а. хас остуол аайы тилийэ тардылынна. Аны бүлүүдэлэрин киэргэтиитэ бииртэн-биир сонун буолан дьону угуйдулар. Маны тэҥэ хас биирдии кылаас турар миэстэтин олус үчүгэйдик, тупсаҕайдык оҥостубутун бэлиэтиир тоҕоостоох.
Быйылгы быыстапка-дьаарбаҥка биир уратытынан ас бүлүүдэтигэр аукцион ыытылынна. Дьэ, ону көрүө этигит! Киһи хараҕа халтарыйар, силин быһа ыйыстыах айылаах кэрэтик киэргэтиллэн оҥоһуллубут бүлүүдэлэр аукциоҥҥа туран атыыга бардылар. Ити курдук аҕыйах чаас иһигэр атыы-тутуу оннун булан, атыыланыахтаах атыыланан, харчыланыахтаах үптэнэн, атыылаһааччы сонун аһы булунан үөрүү-көтүү аргыстаах түмүктэннэ.
«Дьиктилээхэй оҕуруот аһа», «Сир быйаҥын бухатыыра», «Бастыҥ атыы миэстэтэ», «Бастыҥ күһүҥҥү композиция», «Саамай дохуоттаах кылаас» номинацияларынан уонна бөлөхтөрүнэн уопсай түмүк тахсан кыайыылаахтар быһаарылыннылар.
Көмүс күһүн бэлэҕэ – дэлэй астаах-үөллээх күн дьоҥҥо үөрүүнү ыста.
Елена Сыроватская, уопсас. кэрэсп.