Мындааба сынньалаҥ киинигэр Улуу Кыайыы 80, Мүрү нэһилиэгэ тэриллибитэ 65 сылларыгар анаммыт «Алаас ырыата» улуустааҕы күрэһи Мүрү нэһилиэгин дьаһалтата (баһылык Прокопий Румянцев), Мындааба кулууба (директор Владилена Колесова) тэрийэн ыыттылар.
Күрэскэ сэттэ нэһилиэктэн 19 ырыаһыт кытынна. Балаһыанньа быһыытынан, конкурсаннар иккилии ырыаны толордулар: байыаннай-патриотическай уонна көҥүл тиэмэҕэ. Дьүүллүүр сүбэҕэ Дмитрий Бурнашев, Владилена Колесова, Елена Жиганюк үлэлээтилэр. Күрэһи Маргарита Крылова иилээн-саҕалаан ыытта.
Түмүккэ «Патриотическай ырыаны бастыҥ толорооччу» анал аат Мария Федороваҕа (Мүрү), «Кэхтибэт талаан» – Августина Индееваҕа (Мүрү нэһ., Мындааба), «Кэскиллээх толорооччу» – Василий Петровка (Мүрү нэһ., Мындааба), «Бастыҥ ырыаны арыйааччы» – Владислав Лукачевскайга ( Өнөр), «Көрөөччү биһирэбилэ» – Андрей Макаровка (Бороҕон нэһ.), «Иэйиилээх ырыаһыт» анал аат Виталий Курилкиҥҥа (Курбуһах) ананнылар. Өнөртөн Мария Лукачевская – бастакы степеннээх, 2-с Лөгөйтөн Гаврил Шепелев – иккис, Бороҕон нэһилиэгиттэн Иван Сухонин үһүс степеннээх дипломаннарынан буоллулар. Лауреаттарынан бастакы үрдэли Хороттон Тимур Корякин, иккиһи – Бороҕон нэһилиэгиттэн Марсен Протопопов, үһүс үрдэли 1-кы Өспөхтөн Андрей Никитин ыллылар. «Алаас ырыата» ырыа күрэһин кылаан чыпчаал кыайыылааҕынан Айаал Вырдылин ( Мүрү нэһ., Мындааба) таҕыста.
Кыайыылаахтар дипломнарынан, сертификаттарынан, сыаналаах бэлэхтэринэн наҕараадаланнылар. «Алаас ырыата» күрэс быйыл иккис сылын тэрилиннэ. Кыттааччылар: «Эһиил эмиэ тэрийээриҥ, өссө элбэх буолан кыттыахпыт», – диэн санааларын эттилэр.
Матрена Готовцева, «Мындааба» СК уус-уран салайааччыта, СӨ культуратын туйгуна