Уһун кыһыммыт ааһан, сандал сааспыт чаҕылхай күнэ кэрэҕэ-сырдыкка угуйан сүргэни көтөхтө. Сааскы маҥнайгы бырааһынньыкпыт – кэрэ аҥаардар күннэрэ чугаһаата. Бырааһынньыгы көрсө Тулуна орто оскуолатын 6-с кылааһын үөрэнээччитэ Милана Атласова кырачаан бенто-тортары оҥорон умсугуйа түбүгүрэр.
Кини кыра сааһыттан сөбүлүүр дьарыгын туһаҕа таһааран минньигэс тортарын атыылаан бэйэтигэр кыралаан дохуот киллэринэр. Милана дьарыгын туһунан маннык кэпсиир: «Ас астыыры олох кыра сааспыттан интэриэһиргиибин, куруук ымсыыра көрөөччүбүн. Биэс сааспыттан блины буһарар буолбутум. Онтон учууталым Мария Крисьяновна Барашкова торт оҥорорго үөрэппитэ. Билигин «Бисквит тортары», «Медовай», «Красный бархат» тортары оҥоробун. Өссө корицалаах бэчиэнньэлэри, синнабон булочкалары сөбүлээн астыыбын уонна бэрэски игин курдук араас бурдук аһы астыыбын».
Үөрэҕэр эмиэ туйгун кыыс Милана «Инникигэ хардыы» ааҕыыларга, математика, нуучча тылын олимпиадаларыгар уонна шашкаҕа оскуолатын чиэһин үгүстүк көмүскээн миэстэлэһэр, «Оһуор» бөлөххө хомуска уһуйуллар. Ону таһынан бэйэтэ английскай тылы эбии умсугуйан үөрэтэр.
Билиҥҥи гаджет үйэтигэр оҕо ис сүрэҕиттэн баҕаран, дьаныһан туран дьоҕурун сайыннара, үлэлии, айа-тута улаатарын киһи кэрэхсии көрөр, үөрэр.
Мария Аргунова