Лоскуй таҥастан хайдахтаах курдук кэрэ былааччыйа айыллан, төрөөн тахсарый? Киһи сахалыы сайбаччы таҥыннаҕына, сахалыы кут уһуктан төһөлөөх тулабыт сырдыы түһэрий? Мүрү нэһилиэгин олохтооҕо, түөрт оҕолоох ыал ийэтэ, эдэр иистэнньэҥ Елена Москвитиналыын билсиэххэ.
– Елена, иискэ үөрэммитиҥ дуо?
– Дьокуускайдааҕы художественнай училищеҕа дизайнер үөрэҕэр үөрэммитим. Ол кэмҥэ 2011 с. 14-с №-дээх оскуолаҕа биир ый практикабын барбытым. Онно школьнай форма тикпиппит. Мин иистэнэр сиикпин сөбүлээн иккис ыйбын үлэлэтэ хаалларбыттара. Ол курдук, икки ый иһигэр 31 форманы тикпитим. Онтон ыла, биирдиилээн сакаас ылан иистэнэн барбытым. Итиэннэ, Хаҥалас улууһугар «Саха полигон» тэрилтэҕэ үлэлии сылдьыбыттааҕым. Онно баһаам элбэх оробуочай таҥаһы, бириһиэн палааккалары тигэн, үлэ бөҕөтүн көрсөн улахан уопуту ылбытым диэххэ сөп.
– Билигин, ордук тугу тигэҕин?
– 2017 сылтан бэйэ дьарыктаах буолуутун тэриммитим. Миэхэ үксүн сахалыы таҥастары сакаастыыллар. Биирдиилээн да, кэлэктиибинэйи да тигэбин. Ону таһынан, күннээҕи кэтэр таҥаһы, халтан сону тигэбин. Бастаан саҕалыырым саҕана улуустааҕы дьарыктаах буолуу кииниттэн 200-тэн тахса тыһыынча харчынан өйөбүл ылбытым. Онон манекен, иистэнэр массыыналары атыылаһан, ол миэхэ улахан тирэх буолбута. Билигин уопсайа түөрт иистэнэр массыыналаахпын.
– Иискэ оҕолоргун сыһыараҕын дуу?
– Улахан кыыспын кэлэктиибинэй сакааска кыра деталлары тигэргэ кытыннарабын, сөбүлүүр.
– Оҕо сылдьан иистэнэр этиҥ дуо?
– Куукулабар пакет суумка муҥунан таҥас тигэрим. Ол эрээри, уруһуйдуурбун ордорор этим. Ол иһин сөбүлүүр идэбин ылаары художественнайга киирбитим. Онно биһигини үксүн живописка, уруһуйга уонна иискэ үөрэппиттэрэ. Дипломнайбын ииһинэн көмүскээбитим.
– Ээ, оччоҕуна, билигин уруһуйдуугун дуу?
– Уруһуй миэхэ хоббим буолар. Иэйиим киирдэҕинэ биирдэ эмэ быыс булан уруһуйдуубун. Билигин уруһуй саҥа тиэхиньикэтигэр ылсаары сылдьабын. Боростуойдук эттэххэ, дьиэни киэргэтэр хартыыналары уруһуйдаан эрэбин. Тиэхиньикэтэ – текстурнай паастаттан.
– Илиигэр талааннаах киһи буоларыҥ быһыытынан дьиэҕэ-уокка сыһыаныҥ эмиэ тупсаҕай буолуо?
– Ас астыырбын сөбүлүүбүн. Ону таһынан дьиэҕэ үүнэр сибэккилэри бүөбэйдиирбин туохтааҕар да ордоробун. Сайынын оҕуруот аһын арааһын үүннэрэбин.
– Инникитин өссө туох баҕа санаалааххыный?
– Видео-уруок устаммын иискэ маастар-кылаас ыытыахпын баҕарабын.
– Сакаас биэрээччилэр эйиэхэ хайдах тахсыахтарын сөбүй?
– Мин дьиэбэр иистэнэбин. Телефонум: 89681612591. Үлэлэрбин Molena_999 страницабар көрүөхтэрин сөп.
Мария Аргунова