Аҕа дойдуну көмүскээччилэр күннэринэн уонна улууска Аҕа сыла биллэриллибитинэн Курбуһахтааҕы «Сандал» сынньалаҥ киинэ нэһилиэк бары тэрилтэлэрин эр хоһууннарын күүһүнэн «Үс үрэх тардыыта» диэн ааттаан улахан көрүү кэнсиэри тэрийэн бэртээхэй ырыа киэһэтин нэһилиэнньэҕэ бэлэх уунна.
Ол курдук Окоемовка, Уус Күөлүн бары тэрилтэлэрин эр хоһууннара биир улахан хор буолан сыанаҕа тахсан ыллаан ньиргиппиттэрэ көрүөхтэн кэрэ, истиэхтэн эриэккэс буолла. Күн аайы уулуссаҕа көрөр дьоммут таҥнан-симэнэн, сирэй-харах сэргэхсийэн, быһыы-таһаа көнөн – биһиги да эр дьонноох, дурдалаах-хаххалаах эбиппит диэн санааны сахта.
Кэнсиэри сынньалаҥ кинин үлэһиттэрэ Е.Н. Винокурова уонна С.К. Нафанаилова иилээн-саҕалаан ыыттылар. Дьүүллүүр сүбэҕэ сыана бэтэрээннэрэ Г.Д. Местников, Ин. А. Протопопов, кулууп үлэһитэ А.А. Алексеева үлэлээтилэр.
Түмүккэ Гран-при аатын Н.Н. Окоемов аатынан оскуола коллективын эр дьоно ылан 5000 уу харчынан уонна Куду Курбуһахтан төрүттээх ырыа айааччылар уонна биллэр ырыаһыттар туруорбут бириистэринэн 4500 уу харчынан наҕараадаланнылар. 1-кы степеннээх лауреат аатын Окоемовка бөһүөлэгин эр дьоно ылан «Дуораан» эр дьон ансаамбылларын бирииһин 3500 солк. туттулар. 2-с степэннээх лауреатынан ДьУоКХ уонна олохтоох балыыһа эр дьоно холбоһуктаах ансаамбыллара ааттанна. 3-с степеннээх лауреатынан Курбуһах нэһилиэгин дьаһалтатын коллектива ылла.
Тэрээһиҥҥэ тэрилтэлэр, элбэх киһи актыыбынайдык кыттыбыта хайҕаллаах. Кырдьык да, эр киһитэ суох – олох суох, эр киһи Ийэ дойдутун көмүскээччи, дьиэ кэргэҥҥэ дурда-хахха, дуулаҕа хоһуун, булааччы-талааччы, аҕа баһылык, отчут-масчыт, сааһыт бастыҥа!
Маннык тэрээһиннэр сылын аайы тэриллэн, элбэх киһини түмэн саҥа талааннары таһаараллар, эдэр ыччакка суол-иис хаалларан түмсүүлээх буолууну олохтууллар. Түгэнинэн туһанан, тэрийээччилэргэ, кыттыбыт бары тэрилтэлэр салайааччыларыгар, биирдиилээн толорооччуларга, кырачаан, кэрэ чуор куоластаах Алеша Никифоровка, хомус уонна кыл кырыымпа тыаһынан киэргэппит А. Ядрихинскаяҕа, В. Тимофеевка, ырыа куттаах эр хоһууттарбытыгар, бириис олохтообут спонсордарга көрөөччүлэр ааттарыттан барҕа махтал буоллун.
Анна Винокурова, уопсас. кэрэсп.