Билигин олох сайдыытын тэтимин батыһан креативнай индустрия, ол аата аныгы технологиялар көмөлөрүнэн оҥорон таһаарыы, үлэҕэ-хамнаска да күүскэ киирэн эрэр. Маны экономика биир салаатын курдук ылынар буоллулар. Быһата, өй-санаа толкуйа уонна аныгы технология ситимнэһиилэрэ. Дьиҥэр, биһиги күннээҕи олохпутугар баар хаартыскаҕа түһэрии, полиграфия эмиэ оннукка киирэллэр эбит. Ону IТ технология көмөтүнэн барыс киллэрэр салааҕа кубулутуохха сөп.
Ааспыт бээтинсэҕэ Уус Алдан улууһугар креативнай оҥорон таһаарыыга (индустрия) семинар буолла. Манна лекциялары ХИФУ социология уонна салайыы кафедратын үлэһиттэрэ аахтылар, араас холобурдары аҕалан үөрэх ыыттылар. Саҥа өйдөбүл буоларын быһыытынан, ылынарга ыарахан курдук эрээри, үлэлэһэн, оҥорон бардахха, кыаллар суол эбит. Онон улууспут нэһилиэктэригэр даҕаны сыыйа креативнай оҥорон таһаарыы сайдар саҕахтара баар буолан иһиэхтэрэ. IТ технологиялары күүскэ баһылаан истэхпитинэ, нэһилиэк ырааҕа да улахан мэһэй буолуо суоҕа.
Билигин креативнай оҥорон таһаарыыга оҕолор, ыччат түргэнник ылсыахтарын сөп, оскуолаларга оннук хабааннаах куруһуоктар да бааллар. Ол иһин үөрэх тэрилтэтин салайааччыларыгар, оскуола оҕолоругар, төрөппүттэргэ анаан эмиэ лекциялар, маастар-кылаастар ыытылыннылар.
Семинарга Ил Түмэн бэрэссэдээтэлин бастакы солбуйааччы Александр Жирков, улуус дьаһалтатын аппараатын үлэһиттэрэ, нэһилиэктэр баһылыктара, исписэлиистэрэ кытыннылар.
Түмүк санаа маннык буолла: бастакытынан, нэһилиэктэргэ креативнай оҥорон таһаарыы диэн өйдөбүлү олохтооһун уонна онно үлэлэһии кыахтарын көрүү; иккиһинэн, бырайыактары оҥорон эрэгийиэннээҕи уонна федеральнай куонкурустарга кыттыы; үсүһүнэн, ыччат маннык идэни таларга чопчу соруктаах буоларын ситиһии уонна креативнай оҥорон таһаарыы исписэлиистэрэ баар буолалларын ситиһэргэ билиһиннэрэр, үөрэтэр үлэни ыытыы.
Саҥа кэм саҥа экономиканы олоххо киллэрдэ. Ону ылынан үлэлэһэр сорук тыа сиригэр эмиэ кэллэ.
Афанасий Сектяев