СВО саҕаланыаҕыттан мобилизациянан хабыллыбыт байыас уоллаах Кэптэни олохтооҕо Мария Софронова байыаннай дьайыыга көмөлөһөр волонтерскай хамсааһыҥҥа кыттыспыта ыраатта. Таҥас тигиитигэр, сиэккэ өрүүтүтүгэр, кылынын-сиэлинэн харысхаллары оҥорор үлэҕэ барытыгар кыттыһан иһэр, аны тактическай браслеттары оҥорорго үөрэнэн, олорор бөһүөлэгин олохтоохторун түмсүүлэринэн түмэн, тэрилтэлэринэн кэрийэн үөрэтэр.
Бэҕэһээ оҕо саадын уонна Лөгөйдөөҕү лицей интернат коллективтарыгар сырытта, салгыы атын даҕаны тэрилтэлэргэ үлэһиттэри үөрэтиэҕэ.
– Мин бу браслеты оҥорорго Бороҕоҥҥо волонтер кыргыттартан үөрэммитим уонна нэһилиэкпэр олохтоохтору үөрэтэн саҕалаабытым. Бастакы партия көмөбүтүн номнуо ыыппыппыт, онно эмиэ оҕо саадын уонна балыыһа коллективтара кыттыбыттара. Матырыйаалбытын СВО-ҕа сылдьар уолаттардаах ийэлэр харчы кыттыһан сакаастаабыппыт. Сүүс миэтэрэ быаттан 20 браслет тахсар.
Тактическай браслеты оҥорор интэриэһинэй дьарык эбит, мелкай моторика мэйии үлэтэ сайдар. Онон уолаттарбытыгар туһалааҕын ааһан, оҥорооччуларга бэйэбитигэр даҕаны эргиччи туһалаах.
Итини таһынан, хойутаан да буоллар, наскы баайыыны пропагандалаан эрэбин. Аҕа дойду Улуу сэриитин кэмигэр эбэтэ бараан түүтэ сабынан баайбыт наскытын күтүөтүм көрдөрбүтэ, олус чиҥ баайыылаах, бэрт бөҕө-таҕа эбит. Онон оннук баайыыны сөргүтэн үөрэтиэм этэ.
Биир дойдулаахтарбын уолаттарбыт тустарыгар маннык курдук кыра да улахан да көмөнү тиһигин быспакка оҥоро туруоххайыҥ диэн ыҥырабын уонна биир дойдулаахтарбар, нэһилиэгим дьонугар-сэргэтигэр, бары кыттыһан үлэлэһэллэригэр барҕа махталбын тиэрдэбин. Ону тэҥэ СВО-ҕа сылдьар уолаттар ийэлэрэ эмиэ сүбэ-ама буолаллара, санааларын үллэстэллэрэ миэхэ сүрдээх көмөлөһөр, – диэн Мария Дмитриевна санаатын этэр.
Бэйэбэр эрэ буолбакка, уопсастыбаҕа, дьоҥҥо туһалааҕы оҥордорбун диир үтүө санаа баар киһитигэр баар, ол курдук Мария Софронова кэргэнэ Михаил Петрович, төһө да доруобуйатынан хааччахтаах буоллар, элбэх сыл устата хас саас ахсын Кэптэни бөһүөлэгин оҕолоругар эт илиитинэн күрдьэн хаҥкы тэбэр улахан каток оҥорорун сыл аайы суруйабыт, ону быйыл “Саха” НКИХ ханаала республика олохтоохторугар сырдаппытыттан үөрэбит. Үтүө дьыаланы оҥоруу, үтүө хамсааһыҥҥа кыттыһыы Мариялаах Михаил холобурдарыттан саҕыллан хас биирдиибитигэр олохсуйдун.
Диана Седалищева