Аан дойду дьахталларын күнүнэн Кэптэни сынньалаҥ киинигэр Анатолий Бурнашев салайааччылаах, Пётр Перевалов тэрийээччилээх «Ийэҕэ махтал»сынньалаҥ киэһэтэ тэрилиннэ. Үөрүөх иһин, мааны киэһээҥҥи былааччыйалаах, бөрүчүөскэлээх ыал ийэлэрин, эбэлэрин массыынанан аадырыстан ылан. буор-босхо кулууп дьиэтигэр арыаллаан аҕаллылар.
Киирээти кытары аан аттыттан директор Владимир Прядезников үөрэ-көтө көрсөн, бырааһынньыктааҕы саалаҕа атаарда. Болдьохтоох чаас туолаатын кытта өрөспүүбүлүкэҕэ биллэр тамада Александр Гоголев эҕэрдэлээбитинэн киирэн сүргэни көтөхтө. Эҕэрдэ тылы нэһилиэк дьаһалтатын баһылыга Николай Попов эттэ. Николай Николаевич «Ийэлэр эһиги бааргыт олохпут дьиҥнээх дьоруойдара, сир ийэ тыыннаах сибэккилэрэ. Эһиэхэ махталбыт, тапталбыт бэлиэтэ бүгүҥҥү бырааһынньык күнүгэр ананар», – диэбитин долгуйан ытыс тыаһынан доҕуһуоллаатыбыт. Салгыы Александрбыт эҕэрдэтин Күлүмнүүр аатынан култуура дыбарыаһын үлэһитэ Семен Орлов ылбаҕай ырыанан ситэрдэ.
Кэлбит кэрэ аҥаардары «Далбардар» уонна «Тюльпан» хамаандаҕа арааран, оонньууну, үҥкүүнү, ырыаны көҕүлүттэн тутууну Александрбыт кыайа тутта. Хамсаннах ахсын дьиэҕэ, хаһаайкаҕа наадалаах бириистэри туттаран үөрүүбүтүн үксэттилэр. Саамай сөхпүппүт диэн – аҕыстыы буолан олорбут остуолларбытыгар үгүспүт кыайан астаабат суши, торт, картофель фри уо.д.а. араас омук бүлүүдэлэрэ тардылыннылар. Ону тэҥэ утах эгэлгэтин кытта сакалаат, мороженай, виноград, мандарин дэлэччи ууруллунна. «Ханнык да эрэстэрээнтэн итэҕэһэ суох» диэн ибири-сибири кэпсэтии да таҕыста. Кулууп музыканан, уотунан киэргэтээччитэ Виталий Гоголев утахтары хаппахтарын аһан, туорду быһан саала тула остуоллары официант быһыытынан хааччыйан солото суох сырытта.
Өйү сынньар ыйытыктар, көрдөөх оонньуулар ордук үөртүлэр. Марфа Олесова бастакы бирииһи тутан үөрдэ. Бириистэр да сыаналаах электротабаардар буолан биэрдилэр. Бастакы бүлүүдэни тупсаран, хачыгырас оҥорор мультигрилы Иванна Никифорова ылла. Супер бириис хаһаайкатын эҕэрдэлээн ытыс тыаһа хабылынна. Сынньалаҥ киинин үлэһиттэрэ сааланы хаартыскаҕа түһэр зоналаан, кэрэтик киэргэтэн сынньанар усулуобуйаны толору тэрийдилэр. Онуоха эбии итии чэйинэн хааччыйыыны Августина Татаринова толорон ыалдьыттар махталларын ылла. Салгыы араас ооньууларга кыайан, Полина Тарская, Мотрёна Сысолятина эмиэ куукунаҕа туттуллар электрическэй тэриллэри туттулар. Саамай аҕам саастаах ыалдьыт Любовь Петухова харчынан бириис тутта. Марианна Попова эмиэ саастаах ыалдьыт буолан, эмиэ харчынан бирииһи тутта.
Лөгөй эр дьоно бырааһынньык кэнниттэн барыбытын эмиэ аадырыстарынан тарҕатан үөртүлэр. Кэптэни далбардара сынньалаҥы сэргээтик ыыппытын иһин көхтөөхтүк: «Александр – ты супер!» диэн хаһыынан махталларын биллэрдилэр.
Ульяна Бурнашева, уопсас. кэрэсп.