Дьыл оройо ааһан, кыстыкпыт алтыс ыйын ортото буолла. Күн бүгүн улуус үрдүнэн барыта 816 ынах төрөөтө. Билигин сааскы ветеринарнай профилактическай үлэлэр саҕаланнылар.
Ол курдук, ынах сүөһүттэн, былаанынан көрөн, сылгылартан эмиэ хаан ылыыта, сэлликкэ бэрэбиэркэ, Сибиир язватын, лептоспироз, эмфизематознай карбункул (эмкар) курдук ыарыылар утары сэрэтэр быһыылар улуус нэһилиэктэрин аайы ветеринарнай үлэһиттэринэн оҥоһулла тураллар. Ынах сүөһүттэн, сылгыттан ылыллыбыт хаан лейкоз, бруцеллез, инфекционнай ринотрахеит, лептоспироз курдук ыарыыларга көрүллэллэр. Саҥа төрүөххэ аҕылыыр ыарыы (беломышечная болезнь), модьуун (трихофития), сальмонеллез, диплококковай инфекция утары быһыылар оҥоһуллаллар. Ньирэйдэр кулгаахтарыгар бирка иилиллэн, “РегАгро” бырагыраамаҕа бэлиэтээһин үлэтэ күннэтэ ыытыллар.
Маны сэргэ нэһилиэктэргэ ыттарга уонна куоскаларга ииримтийэр ыарыы (бешенство) утары быһыылар оҥоһуллаллар. Ити үлэлэри таһынан сылгылары чиптээһин салгыы ыытыллар. Билигин ханнык баҕарар дьиэ кыылын, көтөрүн атыылааһын, атыылаһыы, нэһилиэктэр, улуустар икки ардыларыгар хамсааһын барыта ветеринарнай сибидиэтэлистибэлээх буолуохтаах. Кыылы, көтөрү атыылыыр, ыытар киһи улуус ветеринарнай управлениетын начальнигын аатыгар сайабылыанньа суруйан, көҥүл ылар. Сүөһү, сылгы, көтөр, атын да дьиэ кыылларын ыытар уонна ылыахтаах киһи “Меркурий”, “РегАрго” бырагыраамаҕа бэлиэтэнэрэ ирдэниллэр.
Саргылаана БУРНАШЕВА, бэтэринээр, хаһыат уопсастыбаннай кэрэспэдьиэнэ