Норуоттар сомоҕолоһууларын күнүн көрсө Хоноҕордооҕу «Түһүлгэ» СК Уус Алданнааҕы техникум устудьуоннарын икки ардыларыгар булугас өйдөөхтөр, көрдөөхтөр оонньуу-күрэстэрин ыытта.
Бэлиэ тэрээһин киирии чааһыгар эҕэрдэ тылы сынньалаҥ киин сэбиэдиссэйэ Екатерина Гоголева эттэ, Сомоҕолоһуу күнүн суолтатын, историятын сырдатар иһитиннэриини библиотекарь Ирина Осипова оҥордо, тематическай быыстапка көрдөрүлүннэ, уус-уран салайааччы Валентина Бубякина таһааран, Сомоҕолоһуу оһуохайа дьиэрэйдэ.
Ол кэнниттэн көрдөөхтөр, булугас өйдөөхтөр «Бары бииргэ» күрэстэрэ саҕаланна. Күрэһи тэрийээччи-педагог Лена Заровняева иилээн-саҕалаан ыытта. Көрдөөх күрэскэ барыта биэс хамаанда хамаанданы билиһиннэрии, ыйытыктарга көрдөөх хоруйу биэрии, миниатюралары көрдөрүү, көҥүл уонна командирдар түһүмэхтэригэр олус көхтөөхтүк кытыннылар.
Түмүккэ 1 м. – «Повар-кондитер-21» кыргыттар хамаандалара, 2 м. – «ЗЧС» бөлөх көрдөөх хамаандата, 3 м. «Доҕордуулар» хомуур хамаандата таҕыстылар. Маны таһынан хамаандалар үс анал ааты ыллылар, ол курдук, «Көрөөччү биһирэбилэ» – «ЗЧС» группа хамаандата, «Бастыҥ дьээбэ» – «Автомеханиктар» хамаанда уонна «Кыайыыга дьулуур» – «Повар-кондитер-24».
Устудьуоннар техникум остолобуойун коллектива бэлэмнээбит минньигэс бириистэрин уонна И.Г. Усова ПК-24 бөлөх студеннарын кытта астаабыт минньигэс тортарын бэлэх тутан олус үөрдүлэр.
Кыттааччылар бары олус кыһаллан, бэлэмнэнэн кэлэн, сонун нүөмэрдэри, көрдөөх миниатюралары оонньоон, ыллаан-туойан, түмсүүлээхтэрин көрдөрдүлэр, көрөөччүнү сэргэхситиэн сэргэхситтилэр, көрдөөх киэһэни бэлэхтээтилэр.
Ирина Осипова, библиотекарь