Мүрүтээҕи эдэр натуралистар станцияларын директора Таисия Шамаева туруорсуутунан, тэрийиитинэн, Тулуна агро хайысхалаах орто оскуолатын базатыгар “Хаптаҥа” сайылыгар “Эколята-2024” үөрэх уонна бэйэни чэбдигирдии лааҕырын бастакы сезона бэс ыйын 15 күнүттэн үлэтин саҕалаабыта.
Лааҕырбытыгар уопсайа 25 оҕо сайыҥҥы сынньалаҥнарын Бороҕонтон, Тулунаттан кэлэн бэрт сэргэхтик, туһалаахтык атаардылар. Оттон от ыйын 1 күнүттэн лааҕырбыт иккис сезона аһыллан үлэлээтэ.
“Эколята-2024” лааҕырга Мүрү 2-с нүөмэрдээх орто оскуолатын алын сүһүөҕүн учуутала Алина Алексеева лааҕыр начальнигынан, Мүрүтээҕи эдэр натуралистар станцияларын педагогтара Надежда Харитонова, Альбина Жиркова, Бээрийэ орто оскуолатын педагога Евгений Сивцев баспытаатал-вожатайдарынан, поварынан Христина Аммосова , мед үлэһитинэн Александра Самсонова үлэлии-хамныы сылдьаллар, ону таһынан Чурапчытааҕы государственнай физкультура уонна спорт институтун устудьуоннара Дарья Габышева, Сайаана Спиридонова, Диана Гоголева, Марат Чекачев үөрэх быраактыкаларын ааһа сылдьаллар.
Лааҕырбыт оҕолорун эт-сиин өттүнэн сайыннаран сарсыардааҥҥы сүүрүүттэн, сэрээккэттэн саҕалаан үөрэх-билии, иитии, үлэ эйгэтигэр күн устата араас экологическай хайысхалаах тэрээһиннэри, күрэхтэри, экскурсиялары тэрийэн ыытабыт.
Оҕолор үлэҕэ-хамнаска сыстаҕас буолалларыгар, күннээҕи режимы тутуһалларыгар, сайыҥҥы сынньалаҥнарын туһалаахтык, интэриэһинэйдик атааралларыгар үлэлэһэбит.
Алина Алексеева, лааҕыр начаалынньыга