Кыайыы 80 сылын көрсө, Уус Алдан улууһугар өр сылларга олорбут, үлэлээбит, үлэ, спорт ветерана, улууспутугар остуол тенниһин киэҥник пропагандалаабыт, улуус чиэһин элбэхтик көмүскээбит теннисист, теннискэ РФ I категориялаах судьуйата, “Уус Алдан улууһун социальнай-экономическай сайдыытыгар кылаатын иһин” бэлиэ хаһаайына, ытыктыыр, өйдүүр-саныыр аҕа табаарыспыт Владимир Семенович Леонтьев сырдык кэриэһигэр Н.Н.Тарскай аатынан спорт Дыбарыаһыгар оҕолорго остуол тенниһигэр улуустааҕы турнир буолан ааста. Күрэхтэһиини теннис улуустааҕы Федерациятын бэрэссэдээтэлэ, “Спецсервис” ХЭТ салайааччыта Е.В. Павлов, Е.Ф. Габышев аатынан оҕо спортивнай оскуолатын теннискэ тренерэ В.П.Яковлев көҕүлээтилэр, иилээтилэр.
Турнирга Дьокуускай куораттан биһиги гимназиябытын 1998 сыллаахха бүтэрбит, “Шишкин Дом” тутуу хампаанньатын дириэктэрэ И.П. Данилов, “Шишкин Дом” экспедитора А.Е.Афанасьев, Владимир Леонтьев төрөппүт кыыһа Ж.В. Леонтьева, Бороҕонтон ветеран теннисистэр Ирина Басыгысова, Виктор Мылахов ыалдьыттаатылар, бэйэлэрин бириистэрин анаатылар.
Өссө да дьарыктанан, кыттан иһиэм
Бу турнирга үөрүөхпүт иһин, В.В. Алексеев аатынан Мүрүтээҕи уолаттар гимназияларын үөрэнээччилэрэ бэрт ситиһиилээхтик кытыннылар. Кинилэртэн 9 оҕо гимназия интэринээтигэр олорор.
Валентин Артамонов, гимназия Х кылааһын үөрэнээччитэ:
—Улууспут теннискэ оҕолорго күрэхтэһиитэ тыҥааһыннаахтык ааста. Онон бастатан туран, тренербэр Василий Павлович Яковлевка махтанабын! Сылы кыайбат кэм иһигэр тренерим дьарыктаан, өрөспүүбүлүкэтээҕи күрэхтэһиилэргэ илдьэ баран, үөрүйэх бөҕөнү ылынным. Бүгүн манна биһигиттэн ураты Суотту нэһилиэгиттэн оҕолор көхтөөхтүк кытыннылар. Бэйэм хайдах оонньообуппун аҕыннахха, кыратык долгуйан ылбытым. Ол эрээри, кыайардыы спортсаалаҕа киирбитим. Полуфиналга Саша Бурцевтыын киирэн, кыайаммын, түмүктүүр түһүмэххэ Алеша Садовниковтыын киирбитим. Алеша Садовников быйыл теннискэ олус үчүгэй көрдөрүүлэннэ. Мин Алешалыын оонньооммун 3:2 хоппутум. Онтон уолаттарга иккилии буолан оонньуу буолбута. Онно Саша Бурцевтыын оонньооммун, кыайан-хотон, финалга тахсыбыппыт. Түмүктүүр түһүмэххэ Гриша Бурцевтыын уонна Айсен Басыгысовтыын киирсэммит, 3:1 ахсаанынан кыайбыппыт. Онон инникитин өссө да дьарыктанан, кыттан иһиэм.
Төрөппүттэр бэлэхтэрэ
Уолаттарбыт быйыл күһүҥҥүттэн спорт Дыбарыаһыгар эдэр тренер Василий Павлович Яковлев салайар сиэксийэтигэр дьарыктаннылар. Дьарыктарын хаһан да көтүппэккэ, остуол тенниһин сөбүлээн, умсугуйан туран оонньууллар. Интэринээппитигэр олорор 57 уол төрөппүттэрэ быйыл гимназиябыт 30 сыллаах үбүлүөйүнэн сибээстээн, оҕолорго саҥа теннис остуолун бэлэхтээбиттэрэ. Ол иһин билигин оҕолор иллэҥ кэмнэригэр дуоһуйа теннистииллэр, бэйэ-бэйэлэрин кытта күрэхтэһэллэр.
Василий Румянцевынан киэн туттабыт!
Бастыҥ спортсмен иитиллээччибит, Россия спордун маастара, остуол тенниһигэр СӨ уон төгүллээх чөмпүйүөнэ Василий Румянцев биһиги интэринээппитигэр олорон, остуол тенниһинэн утумнаахтык дьарыктанан, үрдүкү спортивнай ситиһиилэргэ маҥнайгы хардыыларын оҥорбутун бүгүҥҥү иитиллээччилэрбитигэр киэн тутта кэпсиибит, холобурдуубут. Өссө бу буолан ааспыт турнирга гимназистар Павел Павлов, Айдын Давыдов ситиһиилээхтик кытыннылар.
Оҕолорго суолтата үрдүк
Турниры сүрүн тэрийээччи, Уус Алдан улууһугар теннис Федерациятын бэрэссэдээтэлэ Евгений Павлов:
—Турнирбыт оҕолорго суолтата сүрдээх улахан буоллаҕа. Ол курдук, оҕолор бастатан туран, күрэхтэһии үөрүйэҕин ылаллар, тыҥааһынын эттэринэн-хааннарынан билэллэр. Хас күрэхтэһии аайы оҕо биир тутум сайдан иһэр уонна улууспутугар остуол тенниһин курдук спорт көрүҥүн оҕолорго, киэҥ эйгэҕэ билиһиннэрэбит. Быйылгы күрэхтэһиибитигэр Суотту нэһилиэгин оҕолоро кэлэн кыттыбыттара олус үчүгэй.
Владимир Семёнович кѳмѳтүнэн мин биир үтүѳ күн Уус Алдан улууhугар остуол тенниhин Федерациятын бэрэссэдээтэлэ буолбутум. Кырдьыгы кистээбэккэ эттэххэ, мин хаhан да теннискэ оонньооботоҕум, онно интэриэhим да суоҕа. Арыый да тустууга сыhыаннаах буолуохпун сѳп этэ. Ол да буоллар, Уус Алдаҥҥа остуол тенниhэ сайдыытыгар бэйэбит кылааппытын киллэрсибиппит диэххэ сѳп. Бастаан теннискэ урут оонньообут аҕам саастаах дьон оонньуур эбит буоллахтарына, кэнники эдэр дьон, оҕолор оонньуур буолбуттара, Бороҕоҥҥо теннис саалатын оҥорбуппут. Улууска, өрөспүүбүлүкэҕэ араас таhымнаах күрэхтэhиилэргэ ситиhиилээхтик кыттарбыт. Улууска хаста да «Бастыҥ Федерация» аатын ылбыппыт, оннооҕор өрөспүүбүлүкэҕэ бастаан турардаахпыт. Манна барытыгар Владимир Семёнович сүбэлээн-амалаан, ситиспиппит.
Федерация биир саамай чаҕылхай үлэтин түмүгүнэн, эдэр кэскиллээх оонньооччу Василий Румянцев Кытайга үѳрэнэр кэмигэр биhиги тэрилтэбит үбүнэн көмөлөспүтэ буолар. Василий элбэх үрдүк таhымнаах күрэхтэhиилэргэ ситиhиилээхтик кыттан, Саха өрөспүүбүлүкэтигэр сахалартан бастакынан остуол тенниhигэр спорт маастарын нуорматын толорбута.
Күрэхтэһии сүрүн судьуйата, Е.Ф.Габышев аатынан оҕо спортивнай оскуолатын теннискэ тренерэ Василий Яковлев:
—Оҕолорго теннис күрэхтэһиитэ улууспутугар ыытыллыбатаҕа лоп курдук 12 сыл буолла. Өйдүүбүн, 2013 с. улуустааҕы күрэхтэһиигэ оҕолорго кыайыылааҕынан тахсыбытым. Оччолорго Кэптэнигэ Саха-бельгийскэй гимназияҕа үөрэнэрим. Аҕам Павел Яковлев эмиэ теннисчит. Биһиги быйылгы турнирбытыгар күүс-көмө буолбут дьону ааттыыр сиэрдээх. Ол курдук, Е.В.Павлов, И.П.Данилов, А.Е.Афанасьев, итиэннэ В.С.Леонтьев дьиэ кэргэнэ, предприниматель Н.Г.Бурцев, И.К.Басыгысова, Мүрү нэһилиэгин ветеран-теннисистэрэ көмөлөстүлэр. Манна үлэлиирим тухары улуус оҕолорго первенствота Владимир Семенович Леонтьев аатынан ыытыллыаҕа. Кини мин истиҥник саныыр, убай оҥостор киһим.
Валентина Винокурова, Мүрүтээҕи уолаттар гимназияларын иитээччитэ