Мүрү нэһилиэгин күнүгэр үгэс быһыытынан ыытыллар футбол күрэхтэһиитигэр улуус оскуолаларын хамаандалара күөн көрүстүлэр. Манна ыраах Танда бөһүөлэгиттэн, Кэптэниттэн, Чараҥтан, Мүрүтээҕи уолаттар гимназияларын уонна Мүрү 2-с нүөмэрдээх орто оскуолатын сүүмэрдэммит хамаандалара кытыннылар.
Кыайыылааҕынан Кэптэни футболистара ааттаннылар. Иккис Бороҕон холбоһуктаах хамаандата буолла. Үһүскэ Чараҥ уолаттарын хамаандата тигистэ.
Лөгөй орто оскуолатын үөрэнээччитэ Арсен Сокорутов «Бастыҥ оонньооччу», Рустам Баишев «Бастыҥ вратарь», Чараҥ орто оскуолатын үөрэнээччитэ Дима Москвитин «Бастыҥ көмүскээччи», Танда орто оскуолатын үөрэнээччитэ Артем Савин «Бастыҥ кимээччи», Бороҕон холбоһуктаах хамаандатыттан Чаҕыл Протопопов «Бастыҥ бомбардир» анал ааттарынан бэлиэтэннилэр.
Футболунан сөбүлээн дьарыктанар уолаттар маннык күрэхтэһиилэргэ күөн көрсөн, бэйэлэрин кыахтарын тургуталлар, биир санаалаахтарын кытта алтыһан, доҕор-атас буолаллар. Бу да сырыыга Мындааба спортивнай былаһааккатын футболлуур хонуута доҕордоһуу түһүлгэтинэн буолла.
Ольга Шепелева