Дүпсүн бөһүөлэгин дьоно СВО-ҕа сылдьар уолбутуттан махтал, эҕэрдэ тутан үөрдүбүт, долгуйдубут. Нэһилиэкпит араас көлүөнэ волонтердара кыахпыт, сатабылбыт тиийэринэн кыттыһан, ис сүрэхтэн кыһаллан СВО-ҕа ыарахан балаһыанньаҕа сылдьар биир дойдулаахтарбытыгар туһалаатын, араҥаччылыы сырыттын диэн көмөбүтүн өссө да ыыта туруохпут диэн эрэннэрэбит.
Бу соторутааҕыта бары кыттыһан харчы хомуйан, оскуола оҕолоро, Күлүмнүүр аатынан технопаарка үлэһиттэрэ уонна Дүпсүн аҕа саастаах волонтердара СВО байыастарыгар анаан барыта 76 устуука харысхалы оҥорбуппут. Ону таһынан аҕа саастаах волонтердар госпиталларга эмтэнэр байыастарга туһалаах буоллун, араҥаччылыы, арчылыы сырыттын диэн, инбэлиит кэлээскэтигэр 25 устуука олбоҕу тикпиппит. Бурдук ас астаан, балык ыһааран бэлэмнээбиппит.
Бу аһы уонна оскуола оҕолорун суруктарын, харысхаллары Дүпсүнтэн төрүттээх уолаттарга анаан бэлэмнээбиппитин, быйыл күһүҥҥүттэн баайбыт харыстанар сиэккэлэри Александр Сивцев куоракка киллэрэн туттарбыта. Оттон харысхаллаах олбохтору уонна “Сардаҥа” уһуйаан иитиллээччилэрэ “Волонтёр оҕолор” хамсааһыҥҥа кыттыһан оҥорбут “розжигтарын”, уруһуйдарын уонна Докучаевскай оҕолоругар анаан хомуйбут кинигэлэрин Дьокуускайга волонтёр Лена Троеваҕа Тит Соловьёв тиксэрбитэ. Күн бэҕэһээ Лена Дмитриевна Москваҕа Саха сирин Постпредствотыгар волонтёрскай пууҥҥа илдьэн туттарда.
Эйэлээх олох иһин бука бары туруулаһыаҕыҥ, уолаттарбытыгар күүс-көмө буолуоҕуҥ!
Пелагея Соловьёва. Дүпсүн