Дьикти кэрэ айылҕалаах, ыраас салгыннаах Дабаадыма сиригэр Дүпсүн орто оскуолатын иһинэн «Кустук» үөрэхтээһин лааҕыра уонна «Юные якутяне» республикатааҕы ресурснай киин филиала В.В. Никифоров-Күлүмнүүр аатынан Дүпсүннээҕи оҕо технопааркатын сайыҥҥы оскуолата технопаарка аныгылыы тутуулаах киэҥ, ыраас, сырдык дьиэтигэр үлэлээтилэр. Бу лааҕырдарга Дүпсүнтэн, Бороҕонтон, Суоттуттан, Найахыттан, Дьокуускай куораттан алын, орто сүһүөх кылаастар үөрэнээччилэрэ сайыҥҥы сынньалаҥнарын икки нэдиэлэ устата туһалаахтык атаардылар, үөрэнэн элбэҕи биллилэр, доҕордостулар. Үөрэхтэрин таһынан этэрээттэринэн арахсан араас күрэхтэһиилэргэ кытыннылар, оонньоотулар, дуоһуйа сынньаннылар.
«Кустук» лааҕыр оҕолоругар үөрэхтэрин түмүгүнэн анал ааттар иҥэрилиннилэр. Ол курдук: «Кустук лааҕыр бастыҥ математига» анал ааттары Мартынов Айаал (2-с кылаас, «Айыы кыһата» оскуола, Дьокуускай к.), Бурнашева Кюннэй (3-с кыл., Дүпсүн оскуолата), Бурцев Айыллаан (4-с кыл., Суотту оскуолата), Протопопова Алгыстаана (5-с кыл., Мүрү 2№-дээх оскуолата), Соловьев Айан (6-с кыл., Дүпсүн оскуолата) ыллылар. «Бастыҥ буочар» анал аат
Дорофеева Дамираҕа (4-с кыл., Дүпсүн оскуолата), Прибылых Воваҕа (6-с кыл., Дүпсүн оскуолата) иҥэрилиннэ, оттон «Бастыҥ ааҕааччыларынан» Бурнашева Кюннэй (3-с кыл., Дүпсүн), Прибылых Вова (6-с кыл., Дүпсүн оскуолата) ааттаннылар.
Оҕолорго биир үөрүүлээх умнуллубат түгэнинэн Доҕордоһуу күнэ буолла. «Кустукка» шефтэһэ сайыҥҥы оскуола оҕолоро кэлбиттэрэ. Ол күн Кутурҕан күнэ буолан, олохтоох библиотека үлэһитэ Прасковья Сивцева советскай норуот Аҕа дойду сэриитигэр кыргыһыытын, кыайыытын туһунан оҕолорго кэпсээбитэ, үөрэнээччи Айаал Николаев викторина ыыппыта биһирэннэ. Этэрээттэр бэйэлэрин билиһиннэрбиттэрэ, эҕэрдэ нүөмэрдэри көрдөрбүттэрэ. Дрону көтүтүү эмиэ туспа өйдөбүлү иҥэрбитэ.
«Кустук» лааҕыр бары үлэһиттэригэр Ольга Неустроеваҕа (лааҕыр начальнига), иитээччилэр Маргарита Алексееваҕа, Наталья Соловьёваҕа, медик Раиса Ушницкаяҕа, минньигэс астаах повардарга Ксенья Дмитриеваҕа, Марианна Соловьёваҕа уонна технопарк сайыҥҥы оскуолатын үлэһиттэригэр методист Сахаяна Федороваҕа, баһаатайдар Елена Николаеваҕа, Василиса Михайловаҕа, педагогтар Мария Сивцеваҕа, Алексей Тимофеевка уонна Захар Копыриҥҥа оҕо сынньалаҥын көдьүүстээхтик тэрийбиттэригэр төрөппүттэр ааттарыттан истиҥ махталбытын тиэрдэбит.
Кэнчээри ыччаппыт сайдарын, билиитэ-көрүүтэ хаҥыырын туһугар, инники олоҕор кэскилин сөпкө тобуларыгар сатабылларын-билиилэрин иҥэрэр учуутал-иитээччи дьоммут өрүү да айымньылаахтык үлэлээҥ диэн бастыҥ баҕа санаабытын этэбит.
От ыйын 1 күнүттэн «Кустук» лааҕыр иккис түһүмэҕин саҕалаата.
Пелагея Соловьёва