«Россия – моя история» кииҥҥэ олунньу 8 күнүгэр Туймаада волонтёрдара хамсааһын иһинэн өрөспүүбүлүкэ уһуйааннара «Туллук – символ мира и добра» аахсыйа ыытылынна. Дьокуускай куорат уһуйааннарын иитиллээччилэрэ, төрөппүттэрэ, өрөспүүбүлүкэ улуустарыттан иитээччилэр кытыннылар.
Ыҥырыылаах ыалдьыттарынан Норуодунай фронтан, Дьахталлар өрөспүүбүлүкэтээҕи лигаларыттан, ыччат политикатыгар министэристибэтиттэн, СВО кыттыылааҕа уолаттар махтал тылларын эттилэр, алгыстарын анаатылар уонна Кыайыы биһиги туспутугар буоларыгар эрэллэрин биллэрдилэр.
Уһуйааннар презентацияларын экраҥҥа көрдөрөн, аахсыйаҕа туох үлэ ыытыллыбытын кэпсээтилэр. Куорат уһуйааннарын оҕолоро кэнсиэр нүөмэрдэрин туруорбуттарын ытыс дохсун тыаһынан доҕуһуоллаатыбыт. Дүпсүн нэһилиэгиттэн «Сардаҥа» уонна «Кэскил» уһуйааннарыттан төрдүө буолан кыттыыны ыллыбыт. Дьаарбаҥкаҕа уонна барыта сүүйүүлээх оонньууга бэйэ сүөһүттэн эт, буотарах уонна оҥоһук биэрэн кыттыстыбыт. Манна киирбит үп барыта волонтёрдар фондаларыгар киирэн, Аҕа дойдуларын көмүскүү сылдьар уолаттарга барыаҕа.
Итини таһынан туллук оҥоруутугар маастар кылаастарга кытынныбыт. Онон байыаннай дьайыы бара турар сиригэр ыытарга анаан хомуллубут таҥаһы, туттар тэрили уонна илиибит сылааһын иҥэрэн тикпит, оҥорбут туллуктарбытын «Якутия с тобой» кииҥҥэ туттардыбыт. «Волонтёры Саха. Дети» хамсааһын саҕаланыаҕыттан ордук күүскэ үлэлэспит уһуйааннарга «Волонтёры Саха» уопсастыбаннай хамсааһын аатыттан махтал суруктары уонна Чебурашка оонньууру бэлэх туттардылар. Олор истэригэр биһиги «Сардаҥа» уһуйааммыт аата ааттанна.
200-тэн тахса кыттааччылаах аахсыйаны Антонина Титова уонна Лена Троева-Лугинова салайыыларынан куорат уһуйааннарын үлэһиттэрэ тэрийэн ыыттылар. Үтүө санаа үксүү турарыгар, эйэлээх олох иһин бары күүскэ үлэлииргэ бигэ санаалаах тарҕастыбыт.
Пелагея Соловьёва, уопсас. кэрэсп.