И.Н. Жирков аатынан Дүпсүн орто оскуолатын хомусчут уолаттарын «Кэскил» республика образцовай ансаамбыла (сал. Т.С. Михайлова, Е.В. Атласова) тохсунньу 5-6 күннэригэр Москва куоракка тиийэн, хомустарын дьүрүһүтэ оонньоттулар, ситиһии көтөллөннүлэр.
Хомусчуттар “Бриллиантовые нотки” республикатааҕы фестиваль-куонкурус кыайыылаахтарынан ааттанан, дойдубут тэбэр сүрэҕэр “Жизнь городов” фестивальнай кэмитиэт тэрийэр Саҥа дьыллааҕы бырааһынньыгар “Рождественские звезды – 2025” аан дойдутааҕы фестиваль-куонкуруска кытыннылар. Уолаттар уонна салайааччылар сыралаах үлэлэрин түмүгэ – I степеннээх лауреат, итиэннэ “Фольклор» номинацияҕа Гран-при үрдүк аатын ылар үөрүүнү биллилэр.
Хомусчуттарбыт “Космос” кэнсиэрдиир саала улахан сценатыгар тахсан, олоҥхо – уус тыл, уран өй сүдү айымньыта, саха омук тылынан уус-уран айымньытын чыпчаала буоларын бигэргэтэн, «Дьулуруйар Ньургун Боотур» олоҥхоттон “Үрүҥ Уолан өрөгөйүн» хомус дьүрүскэн тыаһын нөҥүө дьүһүйэн, көрөөччү биһирэбилин, сэҥээриитин ылыан ыллылар.
Бу фестиваль-куонкуруска Россия уонна СНГ дойдуларыттан талааннаах 2000-тан тахса кэнчээри ыччата түмсэн, Ороһуоспатааҕы дьиҥнээх аптаах-алыптаах кэми атаардылар. Кремль харыйатыгар дуоһуйа сынньаннылар, саҥаны-сонуну сэҥээрэ көрөн, араас омук оҕолорун кытта билсэн умнуллубат күннэри атаардылар.
Ольга Шепелева