Дьол тус туруктан тутулуктаах

Ким дьылҕатын тымтыктанан көрүөн, туох күүтэрин билиэн баҕарбатаҕай? Хайа баҕарар норуокка билгэлэнии, таҥхаланыы диэн баар. Билигин Саха сиригэр эмиэ билгэ араас көрүҥүнэн үлэ-хамнас ыытылла турар кэмигэр Сюцай диэн Кытай сыыппаранан билгэлиир билимин үөрэтэр, тарҕатар Александра Дегтяреваны кытта билсиэҕиҥ. Александра Бороҕонтон төрүттээх. Тутааччы-инженердэр Павел Антонович уонна Прасковья Афанасьевна Дегтяревтар дьиэ кэргэннэригэр төрөөбүтэ. Билигин Санкт-Петербург куоракка олорор. Сюцайы үөрэтэрин таһынан тоноҕоһу көннөрөр “Атлас-Стандарт” хампаанньаҕа үлэлиир. Дьэ, онон саҥа үүммүт 2025 сыл тугу кэпсиир?

Хас биирдии сыл бэйэтэ туһунан эниэргийэлээх, күүстээх. Оттон хайа да күүс сырдыктаах даҕаны, хараҥалаах даҕаны. Быйылгы сыл докумуону толорорго, дьыаланы оҥорсорго табыгастаах. Ону таһынан үүммүт сылга дьыала-куолу, бырайыак, улахан хамсааһыннар түмүктэнэр аналлаахтар. Онон Анал байыаннай дьайыы эмиэ бүтэр уһугар кэлэр чинчитэ биллэр. 

Туох барыта киһиттэн бэйэтиттэн тутулуктаах. Үөрэ-көтө сылдьар киһи тахсар, табыллар. Эниэргийэтэ оннук үлэлиир. Онуоха кини ити сылга бэйэтин дьыалатын арыныахтаах, саҥаны толкуйдуохтаах. Оттон сулана, кыҥкыйдыы сырыттахха, сүрэҕи уматан кэбиһиллэр, алдьаныы буолара саарбаҕа суох. Киһи мунар-тэнэр, эрэйдэнэр. Сюцайга уопсай уонна тус аахтарыы диэн баар. Холобур, бүгүҥҥү күн сыыппарата (күнэ, ыйа, сыла) дьоҥҥо барытыгар биир тэҥник дьайар.

Тохсунньу 12 күнүн уопсай сыыппарата – 4. Ол – мистическай сыыппара. Чиэһинэй уонна үтүө буолуу күнэ. Бу күн искэ чуумпутук үөрүллүөхтээх. Үөрэ-көтө сырыттахха, тугу эрэ сүүйүөххэ, бэлэхтэтиэххэ биитэр бэлэхтиэххэ сөп. Оттон курус турукка туоххун эрэ сүтэриэххин сөп. Онон ис-искититтэн үөрүҥ. Бу күҥҥэ сыал-сорук туруорунан, кумааҕыга сурунуохха наада. Ол адьас үчүгэйдик үлэлиирин мэктиэлиибин. Бу күнү бэйэни билиигэ, сыалы чуолкайдыырга анааҥ. Соччото суох түгэннэр буолуохтарын сөп. Онуоха өйдөөн-төйдөөн сыһыаннаһыахха наада, — диир Сюцай маастара.

Хас биирдии киһи төрөөбүт күнүнэн туох күн, ый, сыл тосхойорун сыыппараларынан ааҕан, тус халандаарданар. Оннугу билэр киһи күннээҕигэ эрэллээхтик сылдьар, таба дьаһанар, аттарынар. Александра өҥөтүнэн туһаныан баҕалаахтар 89841124568 (ватсап) нүөмэринэн билсиҥ.

Уйаара КУСТУК.