Улууспутуттан төрүттээх Дьокуускай куоракка олорор биир дойдулаахтарбыт түмсүүлэрин көрсүһүүтүн улуус саҥа салалтата тэрийэн ыытта.
Көрсүһүүгэ РФ Госдуматын депутата Петр Аммосов, СӨ Ил Түмэнин вице-спикерэ Александр Жирков, Егор Жирков, Иван Данилов, Николай Дегтярев, Афанасий Мигалкин, Иннокентий Бочкарев, Айхал Габышев, о.д.а. бизнес, предпринимательство эйгэтин үлэһиттэрэ уонна нэһилиэктэр түмсүүлэрин бары салайааччылара, улуус дьаһалтатын баһылыга Василий Аммосов, баһылык солбуйааччыта Анатолий Сторожев, нэһилиэктэр түмсүүлэрин салайааччылара, дьаһалта үлэһиттэрэ түмүстүлэр.
Куоракка биир дойдулаахтарбыт түмсүүтүн саҥа салайааччытынан Егор Неустроев ананна. Улууспут саҥа салалтатыгар ситиһиилээх үлэни баҕаран үгүс үтүө тыл, баҕа санаа этилиннэ. Улуус баһылыга Василий Аммосов улуус түмсүүтүн салайааччытынан үлэлээбит Лена Заболоцкаяҕа махтанан туран, улуус эҕэрдэ суругун, наҕараадатын, ону тэҥэ Дьахталлар аан дойдутааҕы күннэринэн кэрэ аҥаардарга сибэкки дьөрбөтүн туттарда. Олус бэрт, тэрээһиннээх көрсүһүү улуус баһылыгын үлэтин, саҥа былааннарын, соруктарын туһунан киэҥ ис хоһоонноох кэпсэтиинэн, тыл этиитинэн түмүктэннэ.