Бүгүн улуус дьаһалтатыгар саха спордун үрдүк таһымҥа таһаарбыт Николай Тарскай үбүлүөйдээх 100 сылын тэрээһиннэрин торумнуур өрөспүүбүлүкэтээҕи хамыыһыйа мунньаҕа буолла.
Манна хамыыһыйа бэрэссэдээтэлэ, СӨ бырабыыталыстыбатын бэрэссэдээтэлин солбуйааччы Сергей Местников, СӨ спордун министрэ Леонид Спиридонов, улуус баһылыга Василий Аммосов уонна Баатаҕай нэһилиэгин дэлэгээссийэтэ кыттыыны ыллылар.
Мунньахха этиллибитинэн, быйыл өрөспүүбүлүкэ улахан таһымнаах күрэхтэһиилэрэ үгүс өттө Бороҕоҥҥо ыытыллар буолбуттар. Олортон биир бастакылара Николай Тарскай бирииһигэр көҥүл тустууга өрөспүүбүлүкэ чемпионата ыытылла турара буолар. Онон быйыл Уус Алдан өрөспүүбүлүкэ спордун сүрүн түһүлгэтинэн буолуоҕа.
Үбүлүөйдээх сыл тэрээһиннэрэ Дьокуускай куоракка, улууска ыытыллаллара ахтылынна. Ол курдук үйэтитиигэ болҕомто ууруллан ХИФУ-га устудьуоннарга өрөспүүбүлүкэтээҕи уонна манна, Баатаҕайга оскуола оҕолоругар улуустааҕы НПК-лар ыытыллыахтара.
Маны тэҥэ Николай Тарскай 95 сылыгар тахсыбыт кинигэни матырыйаалын эбэн хат таһааттарарга «Саха» НКИХ документальнай киинэ оҥороро былааҥҥа киирбиттэр.
Сүрүн болҕомто биллэн турар, Николай Тарскай төрөөбүт нэһилиэгэр ыытыллар үлэлэргэ ууруллар. Ол курдук, суолга, спорт саалаҕа, оскуолаҕа өрөмүөннэр ыытыллаллара былааннаммыт. Итини тэҥэ ыаллары киинтэн ититиигэ холбооһуну эмиэ эттилэр.
Маныаха Сергей Васильевич тутуулар өрөмүөннээһин бырагыраамаларга киллэрдэххэ уонна ититиини үбүлүөйдээх эрэ сылга буолбакка, бырагыраама былаанынан кэлэр сылларга да оҥоһуллуохтарын сөбүн эттэ.
Кини сүрүн болҕомтону үйэтитиигэ ууран, кэлэр кэнчээри ыччат үүнэр көлүөнэ Николай Тарскай туһунан дириҥник билэрин ситиһиэхтээхпит диэтэ. Бу үлэ өрөспүүбүлүкэ бары оскуолаларыгар ыытыллыахтаах диэн тоһоҕолоон бэлиэтээтэ.
Кырдьыга, Николай Тарскай туһунан билиҥҥи ыччат билиитэ олус татымынан, кинини тустуук этэ диэн кэпсииллэрин туһунан элбэх киһи этэн аһардылар.
Оттон улууспутугар Тарскай сылын арыйыы олунньуга НПК кэмигэр ыытыллара былааннарын эттилэр. Онон үбүлүөйдээх сыл тэрээһиннэрэ саҕаланнылар.
Афанасий Сектяев