«Дыгын оонньууларын» иккис сүүмэрдиир күрэхтэһиитэ түмүктэннэ. Уус Алдан улууһун Бороҕонугар икки күннээх тыҥааһыннаах, үрдүк күүрүүлээх илин-кэлин түсүһүүлэрдээх киирсиилэр барыбытын долгуттулар, өрүкүттүлэр.
Түмүккэ Нам чулуута, уус алданнар күтүөппүт Вячеслав Дьяконов үрдүкү үктэлгэ таҕыста. Онон «Чөмпүйүөн кубогын» үһүс төгүлүн ылла. Бу кыайыытынан кини улуус баһылыгыттан 150 солк. сертификат, Баатаҕай нэһилиэгин баһылыга Михаил Белолюбскайтан убаһа уонна «Дыгын оонньууларын» сэттэ төгүллээх кыайыылааҕа Иван Белолюбскайтан эмиэ убаһа ылан барда.
Иккис үктэлгэ Ньурба ньургуна Николай Обоев тахсан, Иван Белолюбскай аймахтарыттан 100 тыһ. солк. тутта. Үһүс миэстэ Кэбээйи бастыҥа Яков Дмитриев буолла уонна төрүт оонньуулар федерациятыттан Михаил Друзьянов 50 тыһ. солк. туттарда.
Уус алданнар уолаттарбыт дьиэлэригэр-уоттарыгар бэркэ кытыннылар. Бары көрүҥнэргэ эриэ-дэхси көрдөрүүлээхтэр. Онон инникигэ эрэли үөскэттилэр.
