“Дыгын оонньууларыгар” сүүмэрдиир өрөспүүбүлүкэтээҕи иккис түһүмэх бастакы күнэ түмүктэннэ. Спорт төрүт көрүҥнэригэр “Чемпион кубога” күрэхтэһии “Дыгын оонньууларын” сэттэ төгүллээх муҥутуур кыайыылааҕа Уйбаан Белолюбскай чиэһигэр ыытыллар.
Иккис сүүмэрдиир түһүмэххэ барыта 40 кыттааччы күөн-көрсөр. Бастакы күн “Үс төгүл үс”, “Тутум эргиир” уонна мас тардыһыыта тыҥааһыннаахтык аастылар.
Ону сэргэ бу күн күрэхтэһии үөрүүлээх аһыллыыта буолла. Онно “Дыгын оонньууларын” 2024 сыл муҥутуур кыайыылааҕа Дьулустаан Ноговицын-Таас Боотур Чемпион кубогын Уйбаан Белолюбскайга туттарда.
Эҕэрдэ тыллары Уус Алдан улууһун баһылыгын солбуйааччы Анатолий Сторожев, СӨ спорт төрүт көрүҥнэригэр Федерациятын вице-президенэ Михаил Друзьянов, биир дойдулаахпыт, СӨ спордун национальнай көрүҥнэригэр маастара Иван Белолюбскай, күрэхтэһии кылаабынай судьуйата Иван Горохов эттилэр.
Бэлиэ түгэнинэн 2024 сыл түмүгүнэн СӨ спорт төрүт көрүҥнэрин федерациятын лауреаттарын ааттаатылар.
Ол курдук, «Бастыҥ боотур» бириэмийэ Дьулустаан Ноговицыҥҥа, «Бастыҥ уһуйааччы» бириэмийэ Уйбаан Белолюбскайга, «Бастыҥ сырдатааччы» – Александр Посельскайга, «Бастыҥ комментатор» – Борислав Степановка, «Бастыҥ судьуйа» – Иван Гороховка, «Бастыҥ улуустааҕы федерация» – Мэҥэ Хаҥалас улууһун спорт төрүт көрүҥнэрин федерациятыгар ананна.
Оттон бастакы күн күрэхтэһиилэриттэн «Үс төгүл үс» түһүмэххэ 1-кы миэстэни Яков Дмитриев (Кэбээйи) 35,45 м уһуну ыстанан, 2-с миэстэни Владислав Попов (Нам) 34,72 м көрдөрүүлэнэн, 3-с миэстэни Валентин Афанасьев (Ньурба) 34,42 м ыстанан ыллылар. Уус алданнар уолаттарбыт бэйэлэрин кыахтарынан кытыннылар. Бастыҥ көрдөрүүлээх Марсен Колесов (33 м 95 см) сэттис буолла.
Тутум эргииригэр Нам ааттааҕа Вячеслав Дьяконов бу да сырыыга бастаата. Кини 68-та эргийдэ. Иккис Алексей Уваровскай 67-тэ, Алексей Соколов 66-та эргийэннэр, бу көрүҥҥэ 2-с, 3-с бирииһи үллэһиннилэр.
Уус Алдан уолаттарыттан бастыҥ көрдөрүүлээх Арсен Сокорутов 59-та эргийдэ. Маннык көрдөрүүлээх кини кэннэ түөрт киһи баар. Онон дьоһун көрдөрүү буолла.
Мас тардыһыыта эмиэ бастакыттан сүрдээх тыҥааһыннаахтык ааста. Финалга Яков Дмитриев (Кэбээйи), Николай Матаннанов (Таатта), Вячеслав Дьяконов (Нам), Борис Сдвижков (Амма), Тимофей Большаков (Сунтаар) кииристилэр.
Кыайыылааҕынан Николай Матаннанов ааттанна, иккис Яков Дмитриев буолла, үһүс миэстэҕэ Борис Сдвижков тигистэ.
Күрэхтэһии бастакы күнүн түмүгүнэн Нам ааттааҕа, «Дыгын оонньууларын» 2023 сыллааҕы кыайыылааҕа Вячеслав Дьяконов инники күөҥҥэ таҕыста. Иккис эмиэ «Дыгыҥҥа» кыайа сылдьыбыт Алексей Уваровскай, үһүс бүгүн мас тардыһыытыгар кыайбыт Николай Матаннанов иһэллэр.
Сарсын – күрэхтэһии иккис күнэ. Онно төрүт оҕунан ытыы, 400 м сүүрүү, хапсаҕай уонна таас көтөҕүү көрүҥнэригэр кыайыылаахтар быһаарыллыахтара.
Ольга Шепелева, Диана Седалищева, Афанасий Копырин